Dr R Lalthangliana'n sorkar laipui a dàwr

Minister Dr R Lalthangliana chuan nimin khan a department enkawla hmalakna leh hmachhawpte bawhzuiin sorkar laipui hotute a dàwr.

Dr R Lalthangliana hian Ministry of Micro, Small & Medium Enterprises (MSME) secretary BB Swain hmuin, Mizorama industry-te tihchangtlunna tur project hrang hrang, Luangmual (Aizawl), Lunglei, Champhai, Kolasib leh hmun hrang hranga factory complex dinna tura department-in project an thehluhte an lo pawmsak avangin lawmthu a hrilh.

Sorkar thuchhuah tarlan danin, BB Swain hian MSME hnuaia tourism cluster project hrang hrang siama thehlut turin R Lalthangliana a lo hrilh a ni.

Health minister R Lalthangliana hian Union Health Ministry-a special secretary Gopalkrishnan leh official dangte a kâwm a, Union Health Minister-in ZMC academic block-a hawn tur chungchang a sawipui. RIPANS-a hna hrang hrang thawh mek chungchangah, hmalakna a muan deuh avangin hna a chak theih nan ṭan la turin a ngen a ni.

NITI Aayog member (Health) Dr VK Paul pawh kâwmin R Lalthangliana chuan Mizoram mamawhte a sawipui a; MRI khaw leina tur leh PHC ṭhenkhata x-ray khawl leina tur an bawhzui mek thu leh Boeing company-in nursing school dinna tur an ngaihtuahsak tur thu Dr VK Paul chuan a lo hrilh.

Dr R Lalthangliana hian Ministry of Economic advisor Mrutyunjay Behera leh MZU Southern campus changtu joint secretary-te a hmu bawk.