2019-2022 chhungin Mizoramah khualzin 1,61,000 vel lutah ngai

January 19, Ningani khan Tourist Lodge, Chaltlangah minister of state Robert Romawia Royte kaihhruaiin a department enkawl pathum hotute nen kum 2019-2022 inkara an hnathawh leh hmachhawp thlir let a ni. Tourism department hotute chuan, kum 2019-2022 chhungin Mizoramah tourist 1,61,000 vel an lo kal thu an tarlang.

Robert Romawia Royte chuan, mi pakhat avangin hlawhtlinna a thleng ngawt thei lo tih sawiin, "Thawhhona leh inpekna vanga thleng a ni. Mizoram mipuite'n kum tharah fitness ngai pawimawhin, ṭhalaite chauh ni lo, naupang aṭanga upate thlengin ngai pawimawh lehzual turin ka duh," a ti a; sorkar hnathawkte chu Conduct Rules ngai pawimawh a, social media hman dan thiam turin a chah bawk.

Ṭhutkhawmah hian Tourism department hotute chuan, kum 2019-2022 chhungin Mizoramah khualzin mi 1,61,000 vel an lo kal thu te, homestay 77 an enkawl mek a, tourist lodge 69 zinga 27 chu outsource a nih thute an tarlang. Mizoram GSDP-ah kum 2019-20 chhungin 3.81% leh kum 2020-21 chhungin 3.41% an thawh.

Review meeting-ah hian Information & Communication Technology department, Sport & Youth Services department leh Mizoram State Sports Council hmalaknate thlirho a ni bawk.