Aizawlah Páwl Kût hman a ni

Social Welfare & Tribal Affairs (SWTA) department huaihawtin nimin khan Lammualah Páwl Kût hman a ni a, Mizo hnam làm leh zaite entir a nih bakah intihsiakna chi hrang hrang buatsaih a ni.

Nimina Páwl Kûtah SWTA minister Lalrinawma chu kût pa a ni a; vawiinah chhunzawm tur niin, chief minister Zoramthanga leh Art & Culture minister R Lalzir-liana ten an hmanpui ang.

Páwl Kûtah hian hnam làm leh zai chi hrang hrang entir a ni a; middle school leh high school zirlaite pualin Mizo infiamna - sakuh-uilût, inarpathai, tawlailir intlansiak, záwnga leilawn dím dím, ketaminu tlân, invâwr, insuknawr, inarpasual, kalchhet kal, kawi kah leh tuiûm khirha tui châwite hmangin intihsiakna buatsaih a ni.

Kût pa Lalrinawma chuan, Mizoram sorkarin Zo fate inpumkhatna tur leh hnam nun leh ziaráng humhalhna turin theihtawp a chhuah zel dawn tih a sawi a, "India ram mai bakah, khawvel huapa kan hnam chìn dan leh ziarángte pho chhuak zel turin ṭan a la zel dawn a ni," a ti.

Khawvel ṭhang zel leh hmasawnna chak takin Mizo hnam nun leh ziaráng mawi tak a pawlh dal tial tial nia ngaih theih a nih thu sawiin Minister chuan, "Kan hnam ziaráng leh nunphung kan kalpui ṭhin kha a thi mek zel a, ṭhangtharte zingah phei chuan hriat alawi nei mang lo an tam tawh. Sawi ringawt lo a, a tak taka mit ngeia an hmuh a, an vawn zui theih nan Páwl Kût hi buatsaih a ni," a ti a; Páwl Kût chu ṭhangtharte'n hlâwk takin hmang se a duh thu a sawi.

Páwl Kûtah hian SWTA secretary KT Beicho chu kût thlengtu a ni a, SWTA director Zodingpuii leh Art & Culture director Carol VLMS Dawngkimi te pawhin thu an sawi a ni.