Health Minister hoin hmalak dan ngaihtuah

Mizoramah Covid-19 vei hmuhchhuah an pun tak zel avang­in nimin khan Health minister Dr R Lalthangliana hoin SAD coneference hall-ah emergency meeting neih a ni a, hmalakna dan tur an ngaihtuah.

Health Minister chuan emergency meeting koh a nih chhan sawiin, "Nimina swab sample test result chhuakah mi 55 lai Covid-19 positive hmuhchhuah a ni a, ni khat thilthu a Mizorama Covid-19 vei hmuhchhuah tam ber a la ni. Kan hmalam hun tur a hriat loh a, ni khat thilthuah Covid-19 vei pung thur thur thei dinhmunah kan din avangin a veite enkawlna tura kan ruahman sain min dawl dawn lo a, ngaihtuahna uluk taka kan sen a ṭul. Para military force-te awm dan tur pawh ngaihtuah a pawimawh dawn,"  a ti.

Dr R Lalthangliana sawi danin, Chief Minister ṭhahnem­ngaihna zarah district 10-a dah tur Truelab Quattro Real Time Quantitative Micro PCR Machine leifel a ni tawh a, tun kar chhung hian Mizoramah rawn phurh thlen beisei a ni.

Thusawitu dang, Social Welfare minister Dr K Beichhua chuan para military force-te zingah Covid-19 vei an tam chak em avangin mipui pawh kan thla a muanglo tih sawiin, "Fimkhur tura in hriattir a pawimawh takzet. Kan thawhrimna leh kan hahpuina zawng zawng hi zankhat thilthuah engmah loah a chang palh ang tih a hlauhawm a, kan fimkhur tlan zui zel a ngai tak zet a ni," a ti.

Meeting-ah hian Mizoram chhunga Covid-19 enkawlna CCC leh DCHC dinhmun thlir niin Aizawla CCC hrang hrang Tribal Art Centre, Tanhril (khum 50 awmna), Beraw CCC (khum 39 awmna), Zokhawsang CCC (khum 46 awmna, Assam Rifles ho inenkawlna), Multipurpose Centre, ITI (khum 49 awmna) rua­hman fel tawh a nih thu tarlan a ni. Meeting-a tarlan a nih dan chuan Synod Camping Centre, Neihbawih, Sihphir chu khum 80 vel dah theih tura beisei niin tun­ah hian a enkawltute nen indawr mek a ni. Serchhip-a Nur­sing School sak zawh tawh la luah loh chu CCC atan ruahman niin, cheiṭhat mek a ni a, kawlphetha leh tui lakluh fel a ni ṭep tawh. Tun kar chhung hian zawhfel beisei niin khum 100 awm thei tura ruahman a ni.

Para military force leh civil mite CCC khata dah pawlh tawh loh tura ruahmanna siam a ni. Serchhip Nursing School chu BSF ho dahna bik atan ruahmanna siam niin, AYUSH Hospital, Thenzawl leh Tribal Art Centre, Tanhril chu paramilitary-force leh sipai dang dahna tura tih a ni. Assam Rifle ho tan chuan Zokhawsangah CCC siam a ni ang. Civil mi Covid-19 veite enkawlna atan Beraw CCC leh Multipurpose Centre, ITI chu hman tura ruahman a ni.

Mizorama Covid-19 vei hmuhchhuah zinga hmun li a thena hmun thum vel zet mai para-military force te an nih avang­in emergency meeting chuan para military force ho zawm tur quarantine inkaih­hruaina mumal tak siam a, anmahni pawh Covid-19 chungchanga hriattur pawimawhte hrilhfiah nawn leh ṭulin a hria a, hemi atan hian hmalak nghal tum a ni. Meeting-ah hian Medical Operational Team chairman Dr ZR Thiamsanga, Chief Secretary, Home Secretary, DGP leh Health Secretary-te pawh an tel.