Covid-19 positive avangin Sairangah tiamchin awm loin total lockdown an puang

Sairang Village Task Force (VTF) chuan, hnam dang nupa Guwahati aṭanga a rûka Sairanga hawte swab sample August 1, Inrinnia endik result, nimin zinga chhuakah mipa zawkin Co­vid-19 a vei tih hmuh chhuah a nih avangin nimin aṭang khan tiamchin awm loin an khuaah total lockdown an puang.

Sairang VTF thu­chhuah tarlan danin, July 24, 2020 khan hnam dang nupate chu Guwahati aṭangin an haw rù a, a nupui chu Sairang khaw mi a nih avangin Lengpui Road (Sairang area)-ah an chhungte thlám/bûka awmte an fin a ni. An haw thu hi an thlen aṭanga darkar khat hnu velah hriat chhuah a ni.

Sairang VTF-te chuan bawhzui nghalin, Mizorama an luh dan leh an thlen aṭanga an chêt dante an chhui a, home quarantine turin chhung­kaw paruk an hriattir nghal. Ni nga a liam hnuah an swab sample endik lâk a ni a, nimina result chhuakah an pa chu Covid-19 positive a ni tih hmuh chhuah a ni. Guwahati aṭanga Sairang an thlenin, Sairang Dinthar piah Thlanvawng kàwnah an chuanna motor aṭanga chhukin auto-rickshaw an hmang a, an chuanna auto-rickshaw khalhtu chu khung hran tawh a ni. Auto-rickshaw chu khaw chhungah a service tawh avangin mi dang a phurh tawhte chu khung hran nghal vek ni mah se, hripui a darh vak theih laka inven nan total lockdown an puang a ni. Total lockdown chhung hian Sairang khuaa sorkar pisa, bank, sikul, infiamna hmun, gym leh bazarte khâr vek a ni ang.