RBI-in OMB hmanga pûk a phal zat Mizoram sorkarin a pûk zo ṭep

Mizoram sorkar chuan open market borrowing (OMB) hmang­in loan cheng vaibelchhe 100 a pûk leh dawn a, a hma-a a lo puk tawh nen kumin sorkar kum (2022-2023) chhungin cheng vbc. 940 a pukna tur a ni.

Sorkar kum kal mek 2022-23 chhungin Mizoram sorkar chuan Reserve Bank of India (RBI) OMB hmanga sum pûk a phalsak zat chu cheng vbc. 990 a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu RBI-in a buaipui a; RBI chuan OMB hmanga Mizoram sorkarin sum pûk tur a zawn thu January 20, 2023 khan a tarlang.

OMB hmanga sum pûk a nih theih nan RBI-in state sorkar tan sum pûk tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan January 24, 2022 thleng chhanna hun a hawng a ni.

OMB hmanga sum pûk chu kum khatah a pung vawi hnih rulh tur a ni a, kum 10 velah pawisa pûk zawng zawng rulh a ngai a; a punna chu 7-8% vel a ni.

Hriat theih chinah sorkar kum kal mek chhungin Mizoram sorkar chuan OMB hmangin ṭum sarih loan a pûk tawh a, a pûk zat belh khawm chu cheng vbc. 840 a tling .

Financial year 2022-23 chhunga OMB hmanga RBI aṭanga sum pûk phalna Mizoram sorkarin a neih zat chu cheng vbc. 990 a ni.

Tun dinhmunah cheng vbc. 840 a pûk tawh a, cheng vbc. 100 a pûk leh chuan cheng vbc. 940 a pûk dawn ta tih a ni.