KHAWTHLIR

ATC-in thisen pe
Aizawl Theological College zirlaite chuan January 21, Inrinni khan Synod Hospital tan thisen unit 49 an pe a, petute mipa 44 leh hmeichhia panga an ni.

Kawng khâr dawn
Vawiin aṭangin PWD-in Dawrpui Thlanmual chhung kawng an siamṭha dawn a, hei vang hian hna thawh chhungin kawng khar a ni dawn tih Traffic SP Rodingliana Chawngthu-in a tarlang. Kawng hi siam chhung zawng khàr a ni dawn a, zing dar 9:30 aṭanga tlai dar 5 thleng siam ṭhin a ni ang. Hnathawh tibuai thei turin lirthei leh bungrua dah phal a ni lo bawk.

Heroin lem man a ni
Mizoram Police-a CID (Special Branch) team chuan an thu dawn bawhzuiin January 19, 2023 khan Lalhmingmawia (31) s/o Zuithanga, Bawngkawn hnen aṭangin heroin lem an man. Mizoram police thuchhuah tarlan danin, Lalhmingmawia hi báwm, a chhunga sabawn báwm 30-a heroin ni àwm tak thun khah nen man a ni a; ngun taka endik a nih hnuah a lem, heroin ti ṭhinte hnena heroin anga zawrh ni ngeia ngaih a ni. Heroin lem chu taksa tan a hlauhawm hle tih Police thuchhuah chuan a tarlang.

Theihtawp chhuah tum
January 21, Inrinni khan chief minister Zoramthanga chuan a instagram account-ah mipuite tan Mizoram sorkarin theihtawp a chhuah zel dawn thu a tarlang a, "Mizoram sorkar chuan a chhunga cheng Mizo mipuite tan theihtawp a chhuah zel dawn. Pathian ráwn chung zelin kan hmabak leh hmachhawpte tih hlawhtlin a nih zel theih nan i ṭangrual reng ang u," a ti.

Vawk lâk luh khap
Champhai district magistrate James Lalrinchhana chuan thupek chhuahin, vawk pûl hri, African Swine Fever chu ram dang aṭanga la rawn lut thei reng a nih avangin Champhai district-ah Mizoram páwn aṭanga vawk, vawk sa leh vawk sa aṭanga thil siam lak luh khap a nih thu a tarlang. Thupek hi thla hnih chhung atan a ni.