Duan lâwk angin SEDP sem a ni lo "SEDP 2nd instalment sum tur Kan dah vek tawh" - H Rammawi

State Planning Board vice chairman H Rammawi chuan, SEDP second instalment-a sum sem tur an dah vek tawh thu a sawi. Hetih lai hian, Planning department-in SEDP hnuaia ṭanpuina sum (family oriented) sem dan tur a duan ang chuan December 1, 2022 aṭang khan second instalment em ṭan tur a ni a, duan lâwk angin sem a ni lo.

Vanglaini palai zawhna chhangin H Rammawi chuan, dam lohna thila a inentir a haw chauh avangin SEDP second instalment sem hun tur a sawi mai theih loh thu a sawi a, chutih rualin, "Second instalment sum tur hi kan dah vek tawh a, remchang hmasa berah sem a ni ang," a ti.

Planning deptt-in ruahmanna a siam dan chuan, SEDP first instalment-a Rs 25,000 an sem chu September 1, 2022 aṭanga October 31, 2022 chhungin a dawngtu tura thlante hnenah sem tur a ni a; November 15 aṭangin second instalment Rs 25,000 dang semna turin implementing department-te chu ruahmanna thehlut tura tih a ni.

Second instalment sum chu Nov. 15-30, 2022 chhungin implementing deptt-ah pe chhuakin, ṭanpuina chu a dawngtu turte hnen­ah nikum December 1 aṭanga Feb.15, 2023 chhungin sem tura tih a ni a; chutih rualin, Planning deptt chuan SEDP sem dan tura ruahman chu tihdanglam theih a nih thu an tarlang tel bawk.