Hunpui laiin state páwn aṭangin vawk sa kg. 37,767 lak luh a ni

23rd January, 2023

Mizoram sorkarin kum 2022 Krismas leh 2023 kum thar lawmnaah vawk saa indaih lohna phuhrûkna turin Mizoram páwn aṭanga vawk sa (frozen) lak luh phalna December 2, 2022-a a tihchhuah hnuah Mizoramah frozen vawk sa kg. 37,767 lak luh a ni.

AH&Vety department hotute chuan Vanglaini palai zawhna chhángin, December 2, 2022 khan Mizoram sorkarin vawk pûl hri African Swine Fever (ASF) vanga inkhuahkhirhna a thlahdul a, chuvang chuan state dang aṭangin vawk sa lak luh phal a nih angin vawk sa kg. 37,767 lak luh a nih tawh thu an sawi.

Disaster Management & Rehabilitation (DMR) department chuan December 2, 2022 khan Mizoramah kum 2022 Krismas leh kum thar 2023 lawmnaah vawk saa indaih lohna phuhrûk a nih theih nan Mizoram páwn aṭangin frozen vawk sa lak luh phal a nih thu a tarlang a ni.

Frozen vawk sa hi inkaihhruaina zâwm chung leh AH&Vety Director phalna neiin ASF lên lohna state aṭangin lak luh phal a ni a, APEDA pawmpui firm-te chauhin an la lut thei tih DMR thuchhuah chuan a tarlang.

Vanglaini thu dawn danin, DMR department-in ASF inkaihhruaina a thlahdul ní, December 2, 2022 vêk khan KT Business, Zemabawk (Prop. Vanlalsiama Sailo) hnenah frozen vawk sa lak luh phalna permit pek nghal a ni a, ani hian kg. 19,767 an la lut a ni.

KT Business hnenah vêk hian December 6, 2022 khan frozen vawk sa kg. 18,000 lak luh phalna pêk leh a ni a, a vaia KT Business-in Mizoram páwn aṭanga frozen vawk sa an lak luh tawh chu kg 37,767 a tling. Mi dangin an la lut ve lo thung.

KT Business hian Maharashtra state-a Mayur Piggery Farm aṭangin frozen vawk sa an la a; Maharashtra state hi United Nations hnuaia Food and Agriculture Organization-in ASF lènna a chhinchhiah zingah a tel lo nia thu dawn a ni.

Tarlan tawh angin, November 25, 2022 khan Mizoram Pig Farmer Association (MIPFA) chuan Mizoram páwn aṭanga Mizoram sorkarin agency kaltlanga vawk sa lak luh a tum chu kaltlangpui lo turin chief minister Zoramthanga an ngen a; an lehkhaah chuan, ASF a lèn leh an hlauhthawn thu an ziak a ni.