UCC leh kuhva harsatnaah hma la turin MKHC-in CM ngen an tum

Mizoram Kohhran Hruaitute Committee (MKHC) chuan Uniform Civil Code (UCC) chungchangah leh kuhva ro tawlh chungchang leh Mizorama kuhva tharte hralh a nih theihna turin Chief Minister hnenah thu thlen an tum.

MKHC hruaitute chu January 17, 2023 zing khan Synod Office-ah an ṭhukhawm a, hruaitu hlui leh tharte'n mawhphurhna an inhlan bakah, hmalakna tur ṭhenkhat an rêl. MKHC chairman kal chhuak Rev. Dr Vanlalnghaka Ralte-in chairman thar Rev. Dr C Chawnghmingliana hnenah mawhphurhna a hlàn a ni.

MKHC hruaitute ṭhukhawm chuan sorkar laipuiin a buaipui mek UCC chu Kristiante tana ṭha lo tura an ngaih avangin dodal turin chief minister Zoramthanga hnenah ngenna thlen an rêl.

UCC chungchangah hian Mizoram Kohhran Hruaitute Committee chairman Rev. Dr C Chawnghmingliana chuan zawhna chhángin, "UCC hi ṭha kan ti lo a, Kristiante tan duh chi ziazáng a ni lo," a ti.

January 19, 2023-a chhuak Synfocity 872-in a tarlan danin, MKHC chuan Myanmar lam aṭanga dan loa kuhva ro tawlh khuahkhirh a nih theih nan Chief Minister hnena ngenna thlen an rél tih a tarlang.

Kuhva chungchangah hian MKHC Chairman chuan zawhna chhangin, dan loa kuhva ro tawlh rûk chungchang chu politics-a inbeihna a nih tawh avangin MKHC tan inrawlh a rem chiah loa an ngaih thu a sawi a, "Keini'na kan ngaimawh zawk chu Mizorama kuhva thar chhuah hralh theih loha a awm hi a ni a, hralh a nih theih nan hma la turin kan duh a ni ber mai," a ti.

MKHC hian UCC leh kuhva chungchangah hian Chief Minister hnenah ngenna an la thlen lo a, tun kar chhungin an thlen hman beisei a ni.

January 17, 2023-a MKHC hruaitute ṭhukhawm chuan, kumin 2023-a Assembly inthlanpui pualin inthlan thuchah siam tihchhuah an rél bawk.

MKHC-ah hian Mizorama kohhran pawl hrang hrang 15 an tel a, kohhran tin aiawhte committee-ah an tel a ni.