Chief Minister-in Páwl Kût a hmanpui

Social Welfare & Tribal Affairs department bultuma January 20 aṭanga Lammuala Páwl Kût hman chu January 21, Inrinni khan chhunzawm a ni a, intihhlimna chi hrang hrang buatsaih a ni. Kût ni hnihna hi chief minister Zoramthanga'n kût pa niin a hmanpui.

Páwl Kûtah hian sikul naupangte'n hnam lâm leh Mizo thawnthu hmangin lemchante an entir a; Mizo thawnthu lemchanah hian Mauruangi, Chhúrbúra, Mualzavâta, Chawngchilhi, Chawngtinlêri, Pàwngvîna, Lalruanga leh Keichala thawnthute bakah, thawnthu lâr dangte entir a ni. Ropuiliani leh Bengkhuaia te chanchin lemchan hmangin entir a ni bawk.

Kûtah hian Mizo infiamna chi hrang hrang 12 leh chheihlàm hmangin sikul naupangte an intihsiak a; middle school section-ah Chanmari M/S pakhatna niin, H/S-ah Chaltlang H/S-te a pumpuia pakhatna an ni a, chheihlàmah M/S section-ah Chhinga Veng M/S leh H/S section-ah Mizo H/S-te pakhatna an ni.

Kût pa Zoramthanga chuan, Pawl Kûta thil phochhuah leh tihlan kaltlangin a pawimawhna tam tak naupang leh ṭhangtharte'n an hriat a beisei thu sawiin, Pawl Kût chu hman chhunzawm zel ṭha a tih thu a sawi a, "Hmanlaia Mizote chanchin leh an nun danah zir tur tam tak a awm a, chu'ngte chu ṭhangtharte kan zirtir a pawimawh a, chutianga tan chuan Páwl Kût hi hman ṭangkai ṭha a pawimawh," a ti.

Zoramthanga chuan, Mizo thawnthua hriat lârte chanchin lemchana entir chu hlu a tih thu leh, naupang tam takin Mizo nunphunga thawnthute an hmelhriat a, thawnthute'n zirtir ropui leh ṭha tak tak an neihte an hriat phah avangin naupang tan a hlâwk leh zuala a hriat thu a sawi bawk.

Art & Culture minister R Lalzirliana pawhin thu sawiin, "Mizo pipute'n naupang puala kût an neih kha hmânlai Mizote'n naupang an ngaih pawimawh leh an ngaihhlutzia a tilang chiang hle a, hnam nunphung leh ziaráng zirtirna kalpui hi thil pawimawh tak a ni," a ti.

R Lalzirliana chuan, changkanna leh hmasawnna hrang hrang avangin naupang leh ṭhangtharte'n Mizo chîn dan ṭhate leh hnam ziarâng an hriat chian loh a hlauhthawnawm thu sawiin, "Hetiang hun kan buatsaih leh kan hmang hi thil ṭul tak niin ka hria," a ti a; pipute'n huaisenna leh tlawmngaihna nena naupangte an chher dante chu ṭhangtharte'n an hriat a ṭul thu a sawi.

Páwl Kûtah hian kût thlengtu Lalrinawma, Social Welfare minister pawhin thu a sawi a ni.

Sorkar thuchhuah chuan, Páwl Kût chu naupangte'n Mizo infiamna chi hrang hrang an hmelhriatna atan leh naupangte intihhlimna leh infiamna chi hrang hrang buatsaih nan SWTA department-in an buatsaih a nih thu leh, buatsaihna atan sorkar laipuia Ministry of Tribal Affairs aṭangin sum hmuh a nih thu

a tarlang.