Minister-in futsal ground a hawng

Minister K Lalrinliana chuan nimin khan a bial chhunga Kolasib Project Vengah futsal ground thar leh MLA Cup 2023 Kolasib District Open Futsal Tournament a hawng. Futsal ground thar hi Rural Development department leh MLA fund aṭanga sum pek nuai 12 hmanga sak a ni.

K Lalrinliana chuan, futsal ground thar chu Kolasib ṭhalaite tana infiamna kawnga hmasawnna leh hriselna thlentu a nih a beisei thu a sawi a, "Hmasawnna hna chak zawka kalpui tur chuan ruahmanna felfai siam hmasak a ṭul a, Kolasib Town Master Plan-te duan ṭhin a ni," a ti a; Project Vengah Fast Track Court, Judicial quarters sak mek a nih thu te, basketball court leh sorkar hmun pawimawh sakna tur ruahman a nih thute a sawi bawk.

Thusawitu dang Kolasib DC John LT Sanga chuan Mizoram chu tlangram a nih angin, veng hrang hrangah ram leilungin a zir loh avangin football field puitling siam a rem ṭhin loh thu a sawi a, "Heng harsatna hi futsal infiamna intihhmuhna hian hmun tam takah ṭhalaite tan infiamna hmun a hawn sak mek a ni. Project Veng Futsal Ground pawh hian Kolasib ṭhalai tam zawkte tan infiamna kawnga hmasawnna a thlen ngei ka beisei," a ti.