Health Minister-in ACH a tlawh

Health & Family Welfare minister Dr R Lalthangliana chuan July 31, Zirtawpni tlai khan Aizawl Civil Hospital (ACH) a tlawh a, hna thawh mekte a enfiah. Minister hi Health & Family Welfare Board vice chairman Dr ZR Thiamsanga, MLA leh department hotute'n an ṭawiawm.

Dr R Lalthangliana chuan, Covid-19 vangin tum angin thil a kal tluang thei lo tih sawiin, "Zoram Medical College chu Covid-19 veite chauh enkawlna tur (Dedicated COVID Hospital) atan puan a nih avangin ZMC-a damlo enkawl laite pawh ACH-ah thawn phei an ni. Covid-19 ni lo natna hrang hrang vanga harsatna tâwk tam tak an awm a, ACH lam an hah hle a, an inpekna a fakawm," a ti.

Dr ZR Thiamsanga chuan, ACH-ah ICU tur khum 20 chuang awm theihna tur peih a ni ṭêp tawh chu lawmawm a tih thu sawiin, "A bik takin, thingtlang lam mi damlo serious tak takte'n private hospital pan ngai loin ACH-ah enkawlna ṭha tak an dawn theih phah dawn a ni," a ti a, ICU peih a nih chuan thawktu lâk belh a ngaih dawn avangin sorkarin ngaihtuahna a sên a ṭul thu a sawi.

Health Minister hian ACH-ah Medicine ICU khum 10 awmna tur sak mek te, Makeshift ICU khum 10 awmna tur sak mekte leh naupang damlo na zual enkawlna tur Pedia­tric ICU, khum panga awmna tur sak mekte enfiah a ni.