Danglamna hi kan zawrh a ni - Lalduhoma

ZPM leader Lalduhoma chuan, ZPM chu political party dangte aṭangin an danglam tur a ni tih sawiin, chu danglamna chu an zawrh a ni tih a sawi a; Mizoram leh Assam-in ramri an inchuhnaah Mizoramin Assam hnenah ṭan chhan ṭha tak a pe tih sawiin, pawi a tih thu a sawi bawk.

Lalduhoma hian nimina ZPM pisaa inkhawmah thu sawiin, ZPM chu an danglam ngam tur a ni tih a sawi a, "Kan danglamna hi kan zawrh a ni. Kalphung thar kan tih pawh hi danglamna a ni. Miin ZPM hi danglam turin min beisei a, min phût a, chuvangin, kan danglamna tur hi kan thupui tur a ni," a ti.

Politician-te chu Mizo pí leh pú ro hlu - hawihhâwmna tichhetu an ni tih sawiin Lalduh­oma chuan, "Kan thusawiah hawihhâwmna a lang tawh lo, hetiang hi kan culture a ni tawh lo," a ti a; hawihhâwmna chawi nung thar leh turin ZPM mite a sâwm.

Mizoram politics a bawlh­hlawlh tih sawiin Duhoma chuan, "Mi ṭha tam tak an lo lut duh lo a, mi ṭha tam tak kan chán mek. Politics ṭha, mi ṭha zawkte'n telna tlaka an ngaih kan siam a ngai a, ZPM hi miin an en mek. Kan ram siamṭhatna lam hawia thusawi reng reng 'A ZPM hle mai' tih a ni zel. Ṭha tura beisei kan ni a, ṭhat pawh kan tum tur a ni," a ti.

ZPM Leader chuan, "Sorkar ṭha zawk din duhna, ram ṭha zawk thlen duhna vanga tuihâlna a lian em em. Sorkar kan lo hrawn tawhte ang ni lo, a aia ṭha deuh zawk tal tih hi mipui rilru a ni," a ti a; Mizoram mipuiin tunlaia an vei ber chu sorkar ṭha siam a nih thu a sawi.

Lalduhoma chuan, Vairengte lama national highway laih turah package I & II chu Cachar district area leh Mizoram ṭhenkhat a ni tih sawiin, "Package II-ah Vairengtea chhungkua eng emaw zat an bet a, compensation pawh Assam pektir tum a ni. Ramri kan inchuhnaah Assam lam hi point ṭha tak kan pek belh ta a, a pawi tak zet a ni," a ti a; Mizoram inchi khat pawh Assam hnena pe lo turin Mizoram sorkar a ngen.

Mizoram leh Assam-in ramri nia an sawi inang lo chungchangah November 2022 khan thla thum chhungin ramria mipui leh khaw awm dan (geo spatial extent) chian a ngai tih Mizoram sorkarin a dawn thu sawiin Duhoma chuan, "Kumin January 20 khan committee an ko a, zir chiang tur committe an din chauh a ni. Zir chian hman ngaihna a awm tawh loin a lang a, kan sorkar hian an term chhungin ramri hi chinfel loh hrâm dan a ngaihtuah niin a lang," a ti.

ZPM Leader chuan, ramri chungchangah an party-in puih theihna an neih chuan puih an inhuam reng thu sawiin, "Ramri zir chiangtu committee-ah party ṭhenkhat chu an inhnûkdâwk a, keini chu kan la tel a, a theih chin chinah sorkar kan thawhpui dawn. Amaherawhchu, tel vena tlak a nih loh hun a thleng a nih chuan kan tel lo ang," a ti. Tun hnai lawkah Assam CM-in Mizoram chin zau tak lak let a nih thu Assam Assembly House-a a sawi leh Vairengte mite'n Aitlanga an ramah hmunphiah an kêk thei lo chu tlàwm thlak a tih thu a sawi bawk.

Lalduhoma chuan, tunlaiin party pakhatin rethei taka insawi chungin pawisa nen candidate tura mi sáwmin lem an chang niin a sawi a, "Keini chu mipui bum nan a mawia sawi mai mai loin kan danglam tur a ni a, páwn lam lang theia teh pawhin teh tlak kan nih a ngai," a ti.