Sum dinhmun kan siamṭha thei - MPYCC President

Mizoram Pradesh Youth Congress Committee (MPYCC) president Dr Lalmalsawma Nghaka chuan, Congress party chu an sorkar a nih chuan an tih tum leh an intiamnate tihlawhtling chunga Mizoram sum dinhmun siamṭha turin an thawk thei dawn niin a sawi.

Nimina Congress Bhavan-a MPYCC hruai­tute ṭhutkhawmnaah Dr Lalmalsawma chuan, "Congress party hian kan tih tum leh kan intiamnate tihlawhtling a, tibahlah miah si loin sum dinhmun siamṭhat hna nasa takin kan thawk thei dawn tih hi kan chiang a ni," a ti.

Dr Lalmalsawma Nghaka chuan, "Financial year 2022-23 kan la hman zawh loh chhung ringawt pawhin MNF sorkar hian leibá cheng vaibelchhe 1,119.12 a neih belh leh tawh. Kum 1998-2008 chhunga MNF an sorkar chhungin Mizoram sum dinhmun an sawp chhe nasa a, leiba phurrit manganthlak takah min hnûk lut a ni," a ti a; MNF-in pawi an khawih thui hmain hnâwl a ngaih thu a sawi.

MPYCC President chuan, party-te'n inthlan hmain intiam­na leh tawktarh an nei ṭhin tih sawiin, "Manifesto leh policy-te a hlawhtlin theih nan sum dinhmun a ṭhat a ngai a, sorkar kan hrawn mek hian manifesto-te duhthusam ni mah se, a tak ramah tihhlawhtlin a ni thei dawn lo," a ti a; Congress party-in sum enkawl thiam CM candidate Lalsawta an neih thu a sawi bawk.