BSF zawng zawng kan hlauhawm lo - BSF DIG

Tun hnaia Mizorama awm thar BSF DIG, Brig. TM Simte chuan, state páwn aṭanga Mizorama lut BSF-te chu Mizoram sorkarin qua­rantine centre atana a ruahmanah ṭha taka enkawl an nih thu a sawi a, "Mizorama BSF awm sate nen an intlawhpawh lo a, chuvangin, BSF zawng zawng an hlauhawm lo," a ti.

Thuthar thehdarhtute zawhna chhangin Brig. TM Simte chuan, BSF-te Mizorama an luhin, a tìrah Mizoram sorkar hriattir an nih loh thu a sawi a, "Thuneitu sang zawkte aṭangin BSF-te hi mahni awmna hmun pan vat tura tih kan ni a, an lêt chhan hi puanzar chi a ni lo. Chutihrualin, a tirah Chief Secretary emaw Home Secretary-te tal an lo hrilh lo a, lo hrilh se a zia mai tur," a ti a; inbiakpawhna lamah harsatna a awm tawh loh nan theihtawp a chhuah tur thu a sawi.

BSF DIG chuan, hmun hran hrana chawlh hmanga an khaw lama awm BSF-te'n an hmuna awm tura hriattirna an dawn avangin a hlâwmin Mizoramah an lut lo thei lo nia sawiin, "Assam-ah quarantine an nih hnuah Mizoramah an rawn lut a, quarantine-na hmun tura buatsaihah an inhnawh khawm lo thei si lo a, chuvangin, an inkai darh ta niin a lang. Quarantine centre-a awmte hi kan doctor-te'n uluk taka vilin, taksa tichak thei tur lam chi an pe reng a ni," a ti.

TM Simte chuan, a tir­ah thil fel tâwk lo a awm theih thu sawiin, "BSF-te hi Aizawl, Serchhip leh Lung­leiah kan awm a, tunah chuan Mizoram an rawn luhin Aizawla qua­rantine na hmun sorkarin min pekah an awm phawt a ni.

Co­vid-19 laka an fi­hlim tih finfiah a nih hnuah an awmna hmun tur­ah kaltir chauh an ni tawh. Phai aṭanga rawn lette hi Co­vid-19 laka an fihlim tih finfiah a nih hma chuan Mi­zorama awm sate nen kan in­tlawhpawh tawh lo, chuvangin, a awm sate hi chu an hlauhawm loh," a ti. BSF DIG sawi danin, Mizoramah BSF mi leh sa 5,000 vel an awm a, tunah hian Assam aṭangin mi 200 vel a hlâwma rawn lêt tur an la awm. A hnu lamah chuan mi 10 vel te tea rawn lêttîr tum a ni tawh.