Mitdelte tana thawk ṭha chawimawina Chief Minister-in mi pahnih a hlân

Rualbanlote dàwm­kânna lama thawk ṭhate hnena chawimawina, State Award for the Wel­fare of Persons with Disabilities chu nimin khan chief minister Zoramthanga'n Chhing­puii leh Lalkiamlova te hnenah a hlân.

State Award for the Welfare of Persons with Disabilities hi Mizorama hlan vawi khatna a ni a, Commission for Persons with Disabilities (PwD) leh Mizoram Rural Bank ṭangkawp buatsaih niin, thuchei leh Rs 30,000 a keng. Award hlanna inkhawm hi CMO Conference Hall-ah buatsaih a ni.

Chief minister Zoramthanga chuan, thil hrang hrangah state huap chawimawina tam tak pek chhuah a ni tawh ṭhin tih sawiin, "Vawiina state award sem hi thil tih àwm tak a ni. Mi hriat lâr loha ṭhahnemngai taka lo thawkte hi an fakawm a, PwD kan tihte hi an harsatna neih ang nei ve lote ang bawka hlawhtlinna nei thei an ni," a ti a; hlawhtlinna an neih theih nan puihna leh indâwmkân a ṭul thu a sawi.

Social Welfare & Tribal Affairs (SWTA) minister Lalrinawma pawhin thu sawiin, rualbanlote tana theihtawp chhuahtute chawimawi an ni chu lawmawm a tih thu a sawi a, "Rualbanlote dâwmkân kawngah leh an hamṭhatna ngaihtuahsak kawngah sorkarin a theihtawp a chhuah zel dawn a ni," a ti.

Award semna inkhawm hi PwD commissioner Vanlaldiki Sailo-in a kaihruai a, chawimawina dawngtu Chhingpuii leh commissioner Lalkiamlova ten thu an sawi bawk a ni.