MNF sorkarin ruling leh opposition bialah SEDP dawngtu inzat ṭheuhin a ruahman - MNYF President

Mizo National Youth Front (MNYF) president Dr L Thang­mawia, MLA chuan, MNF chu Mizo ram, hnam leh sakhua a ral lohna tura din, Pathianin Mizote tana a pek a nih thu leh MNF sorkarin ruling leh opposition bialah SEDP dawngtu tur inzat ṭheuhin a ruahman thu a sawi.

Dr L Thangmawia hian nimin khan MNF pisa, Mizo Hnam Rûna inkhawmah thu sawiin, "MNF hi kan hnam, kan sakhua leh kan ram a ral loh nana din a ni a, he principle hi kan zawm tlat chuan Pathianin min thlahthlam lo ang tih ka ring. MNF hi Pathianin Mizote tana a pek a ni a, hruai pawh a hruai ṭhin. Kan chapo dawn apiangin min hnûk hniam a ni," a ti.

MNF sorkar hnua inthlan hrang hrang - MP, AMC, LC, VC, LADC leh SHDC-ahte sorkarna an chang tih sawiin L Thangmawia chuan, "Kumin kum tàwpa inthlanpui pawh hi Pathianin kan kutah min pe leh ngeiin ka ring," a ti a; zalenna suala beitu hnam sipaite'n martar huamin ram tan an bei tawh a, an hnung zui tur an nih thu a sawi.

Dr L Thangmawia chuan, Zoramthanga kaihhruai sorkar chu huapzo sorkar a nia sawiin, "Congress sorkar hmasak hun laia land use policy-te kha opposition bial tan beisei ngam a ni lo. MNF sorkar chuan ruling leh opposition bialah SEDP dawngtu tur inzat ṭheuhin a ruahman mai a ni," a ti.

MNYF President chuan, "MNF sorkar chuan sorkar hmasain a tih tawh thil ṭha chu kan chhunzawm zel a, thil ṭha lo zinga mi sorkar zu zawrhte kan titawp mai a ni," a ti a; eptu MLA bial pahnih - Tlabung leh Kawrtethawvengah RD block hawn thar a ni chuan Zoramthanga kaihhruaiin hmasawnna kawngah thliar bik a nei lo tih a tilang niin a sawi.