Fisheries department aṭangin sangha man phalna lâk theih

Fishseries department chuan nimin khan Dapchhuah khuaah lui dung humhalh (riverine conservation) chungchang inzirtirna an buatsaih a, minister K Lalrinliana'n a hmanpui. Fisheries department aṭangin sangha man phalna (license) lâk theih a nih thu tarlan a ni.

K Lalrinliana chuan, luia chêng nungchate humhalh in eizawnna ṭha a siam thei tih sawiin, "Kan dam khawchhuahna turin kan inmamawh tawn vek a, danin a phal chinah a man hun takah chauh kan man a, a humhalh zawnga ṭan kan lak chuan an inthlahpung ang a, kan ram mipui tan sumdawnna pawimawh tak a ni thei," a ti.

Fisheries Minister chuan, "Kan ram intodelhna atana pawimawh em em, luia cheng nungchate hi humhalh thiam a, man phal chin bituk thiam a pawimawh," a ti a; luia nungchate an inthlah pun zel theih nan man duh dan thlâk a ngaih thu sawiin, "A lian leh ei tham chauh man ila, no an pai laiin an inthlah pun zel theih nan zuah ṭhin tur a ni," a ti bawk.

Fisheries Minister hian Dapchhuah Branch YMA hnenah Incentive Award chawimawina thuchei leh Rs 20,000 a hlân a ni.

Fisheries secretary Laldawngliana chuan, luia nungchate awmze neia humhalh a pawimawh thu sawiin, "Lui dung nungcha hmanga eizawngtute'n sorkarin dan leh hrai a zamte ṭha taka an zawm a pawimawh," a ti a; bomb, dynamo, túr leh a dangte hmanga luia nungchate man leh hrai chu dan bawhchhiatna a nih thu leh, Fisheries department aṭangin sangha man theihna licence lak theih a nih thu a sawi.

Awareness pro­gramme-ah hian Dap­chhuah khawtlang hruai­tute leh mipui an tel a, Mamit district fisheries development officer Lalremsangpuii'n luia nungchate humhalh dan tur leh humhalhna dan te, dan bawhchhia hrem theihnate a sawifiah.