ZPM hotute leh MTA an inkâwm

ZPM party hruaitute leh Mizoram Taxi Association (MTA) hruaitute chu nimin khan Aizawla MTA pisaah an inkâwm a; ZPM leader Lalduhoma chuan, sumdawnna lirthei permit vawi khat chiah tihnun nawn (renew) theih chu ṭha lo an tih thu leh, taxi leh lirtheia sumdawngte harsatna chinfel an tum thu a sawi.

Inkawmhona hi MTA president Ralthanmawia'n a kaihruai a, general secretary F Lalruatfela'n MTA dinhmun tlangpui a sawi. Lalduhoma chuan, "Tuna permit vawi khat chiah renew theiha sorkarin a kalpui hi ZPM chuan AMC inthlan aṭang tawh khan thlâk turin kan tlangaupui tawh a, kan thu a la ngai reng a, kan sorkar a nih chuan he harsatna sukiang tur hian ruahmanna kan siam dawn a ni," a ti.

Lalduhoma chuan, lirthei hmanga eizawngte'n harsatna hrang hrang an tâwk ṭhin tih an hriat thu sawiin, "Sum siamna atana permit hman hi ṭha kan ti lo a, eizawnna nghet miin a neih theihna tur hi kan ngaihtuah pui ber a ni. Lirtheia eizawngte an motor a fit chhung chu replace (thlak) theih turin ruahmanna siam kan tum," a ti a; intlân chhâwk chungchang chu party hotute leh a khawihtu department nen ngun taka ngaihtuah tlân ngai a nih thu a sawi.

Lalchhuanthanga, MLA pawhin thu sawiin, Mizorama sorkar tawhte chu lirtheia eizawngte leh kut hnathawktute ngaihsak tak tak lo an nih zel thu a sawi a, "ZPM hi kan sorkar a nih chuan, ‘Kan ti ang’ tia kan sawi tawh hi chu tih ngei kan tum dawn a ni," a ti.