Sorkar motor kum 15 aia rei hman theih a ni tawh dawn lo

Sorkar laipuia Minis­try of Roads Transport & Highways (MoRTH) chuan tun hnai khan notification chhuahin, April 1, 2023 aṭang chuan India ram pumah sorkar lirtheite kum 15 aia rei hman theih a nih tawh dawn loh thu a tarlang.

MoRTH tarlan danin, Central Motor Vehicles Rules tihdanglam a ni a, chumi ang chuan April 1, 2023 aṭang chuan sorkar laipui, state sorkar, union territory sorkar, municipal sorkar leh panchayat-te lirthei chu registration tih a nih aṭangin kum 15 thleng chauh hman theih a ni tawh dawn a, kum 15 aia rei hman theih a ni dawn lo a ni.

Sorkar laipui rua­hman­na thar hian armoured car leh eng emaw bik atana duan (specialised vehicle)-te a huam lo thung.

Vanglaini palai zawh­na chhangin Transport department hotute chuan, kalphung thar chu Mizoramah pawh hman nghal tur a nih thu an sawi a, "Mizoram sorkarin a hranpaa noti­fication a tihchhuah a ngai lo. MoRTH notification hi India ram pumah hman mai tur a ni," an ti.

Transport department hotute chuan, sorkar lai­pui kalphung thar hian tunah chuan mimal lirtheite a huam lo tih sawiin, "Huamtir a nih hun erawh a awm ngei kan ring. Mahse, kan rin dan a ni a, a la huam ngei ang kan ti ngam lo," an ti a; state ṭhenkhatah chuan lirthei hman theih hun bituk a nih tawh thu an sawi a ni.