Hmun pahnihah heroin man

Assam Rifles leh Mizoram Police CID (Crime)-te chuan January 22, Pathianni khan Zonuam, Aizawlah heroin gram 140 an man a, heroin phurhna scooter MZ-01 H-2634 an man bawk. Heroin an man ni Rs 70,00,000 hû a ni.

Heroin neitua puh mi panga - Hminlawma (35) s/o Alim Joe, Zokhawthar, J Lalrinchhana (29) s/o Roliankapa, Kanan Veng, Lalremruata (30) s/o Lalzamlova, Tanhril, C Lalrinawmi (36) d/o C Lalthlamuana, Zotlang leh Lalruatchhungi (26) d/o Vanlalpeka, Dawrpui Vengthar te man an ni a; an lakah thubuai ziah luh a ni.

Mizoram Police-te chuan January 21, 2023 tlaiah khan Vairengteah gas búr phur truck AS-11 CC-2868 aṭangin heroin gram 625 (hawng 50) an man bawk a, cheng nuai 340 hû a ni.

Truck hi Ngopa lam aṭanga tlân, Silchar lam pan a ni a, a khalhtu Azizur Rahman Laskar (40), Sonai, Ramnagar, Cachar man nghal niin, a lakah Vairengte Police Station-ah thubuai ziah luh a ni. Heroin-te hi gas bûr-ah thuhrûk a ni.