KHAWTHLIR

Workshop-ah tel
Nimina New Delhi-a National Workshop for State Legislators on State Finances-ah Mizoram aṭangin MLA pathum - Dr Vanlalṭanpuia, H Lalzirliana leh Dr Vanlalthlana te an tel a, vawiinah chhunzawma zawh a ni ang. Workshop hi PRS Legislative Research buatsaih a ni a; India ram state hrang hrangte sum leh pai dinhmun dik tak zirna te, Covid-19 hripuiin India economy a nghawng dan te, he hun harsa aṭanga hmasawn tura India-in ṭhan a tum dan leh chona hrang hrang a hmachhawn te, hriselna lama hmasawn ngaihnate leh budget document zirchiannatein hun hman tur a ni.

Scooty chesualah nupa an thi
January 22, Pathianni tlai dar 4:30 vel khan Muanna Venga scooty chesualah Lalrampara (27) leh a nupui Lalmalsawmhlui (23)-te an thi. Thu dawn danin, Lalrampara te nupa hi scooty-ah an inphur a, Zuangtuia 132 KV Station péng bulah an hmaa tlân truck lehpelh an tumna lamah chesualin, truck hnuaiah an tlu lut a; truck-in chíl zuiin, chetsualna hmunah an thi a ni.

Hmalak dan tur rél
Champhai District Fire Prevention Committee chu an chairman James Lalrinchhana, district bawrhsap hoin nimin khan IPR conference hall-ah an ṭhukhawm a; February 6-10, 2023 chhunga Champhai district-a Kângmei Ven Hapta hman dan tur leh ṭhál laia kângmei chhuak lo tura hmalak dan tur an rêl. Ṭhutkhawm tarlan danin, Champhai district chu India rama ram kâng thlen tam zualna state 11-a district 26 zingah a tel a; kum 2022-23 aṭanga 2026-27 (kum nga) chhunga kângmei vên nana hmalakna tur, cheng vbc. 19 hû project siam niin, sorkar laipuia Ministry of Environment, Forest & Climate Change leh National Disaster Management Authority pawmpui turin thawn a ni tawh.

Larsapin Champhai district tlawh dawn
Governor Dr Hari Babu Kambhampati chuan February 1-2, 2023 chhungin Champhai district a tlawh dawn a, amah dawnsawn dan tur nimin khan Champhai bawrhsap James Lalrinchhana kaihhruaiin sorkar hotute'n an rêl.