Mobile phone bo chhui theihna Mizoramah hman theih a ni tawh

Mizoram Police chuan thuchhuah siamin, mobile phone bo chhui chhuahna tura duan Central Equipment Identity Registry (CEIR) chu Mizoramah hman theih a nih tawh thu an tarlang.

Mizoram police tarlan danin, tunlaia mobile phone rûk leh rûk sa hralh chhâwn hluar zel tur vênna atan te, mipui himna tur leh dan kengkawhtute tana awlsam zawkna turin sorkar laipuia Department of Telecommunication chuan IMEI data hmanga phone chhuina CEIR an din a ni.

CEIR hi network operator hrang hrangte data khaikhâwmtu a ni a, network pakhatin a blacklist tawh chuan network dang SIM card pawh vuah mah se, IMEI hmangin hman theih loha siam (block) leh chhui (track) theih a ni.

Miin mobile phone an ru emaw, miin an tibo a nih chuan, block turin online-in ceir.gov.in ah an ngen (request) thei a, police station-ah pawh CEIR hmanga block tura ngen theih a ni bawk.

Phone bo chu hman tum an awm chuan CEIR hmangin police-te'n phone awmna nen an chhui chhuak thei a ni.