Hlawh leh DA chungchang sawiho turin sorkar hnathawkte an inhmukhawm dawn

Federation of Mizoram Government Employees & Workers (FMGEW) chuan an hnuaia pawl hrang hrangte chu February 2, 2023-a inhmukhawm turin an ko. Inhmuhkhawm hunah a hun taka hlawh lâk theih loh, sorkar hnathawk dearness allowance (DA) tihpun leh pension kum tihsan chungchangte sawiho a ni dawn.

FMGEW chuan pawl hrang hrang hnena lehkha an thawnah, DA rate chu thla ruk dan zelah tihpun ṭhin a nih thu an tarlang a, "Mizoram sorkar hnathawkte DA pawh tipung ve zel turin sorkarah ziakin kan thlen tawh ṭhin. Chief Minister, Deputy Chief Minister leh minister dangte pawh vawi hnih/thum kan sawipui tawh hlawm. Amaherawhchu, hmasawnna kan nei thei rih lo a ni," an ti.

Supreme Court-in sorkar hnathawkte hlawh chu a hun taka pek ṭhin tur a nih thu leh pek tlai a nih chuan a pung nen pe turin thutlukna a siam tih tarlangin FMGEW chuan, "Mizoram sorkar hnathawkte chu thla eng emaw zat hlawh pek tlai kan ni tawh," an ti a; hlawh pek tlai chungchang chu Chief Minister hoin February 18, 2022-ah an sawiho tawh thu an tarlang.

FMGEW tarlan danin, Chief Minister hoa an sawihonaah hian CM chuan, a hun taka (thla tawp emaw thla thar veleh) hlawh pek chhuah ṭhin a nih tur thu leh, chutianga ti thei tur chuan hmalak zel a tum thu a sawi. Mahse, thla tam tak hlawh pek tlai an ni zui tho a, sorkar hnathawk tam takin harsatna an tâwk a ni.

FMGEW chuan, an pawl inkhawmpuia an rèl tawh angin, Mizoram sorkar hnathawkte pension hun chu kum 62-ah tisang turin sorkarah dilna an thlen thu an tarlang a, "June 23, 2022 khan Chief Minister chuan Cabinet meeting-ah ngaihtuah a nih tur thu min hrilh. Amaherawhchu, tun thlengin Cabinet meeting-ah ngaihtuah a la ni lo a ni," an ti.