BJP a sorkar chuan zalên taka CBI an chêt theih nan hma kan la dawn - BJP President

BJP, Mizoram Pradesh president Vanlalhmuaka chuan, Mizoramah BJP an sorkar chuan zalên taka Central Bureau of Investigation (CBI) an chêt theih nan hma an lâk tur thu a sawi.

Nimina BJP pisaa thuthar thehdarhtute a kawmnaah Vanlalhmuaka chuan, "Mizorama BJP kan sorkar hunah chuan hmasawnna dâltu leh mipuite chan ai ei zotu corruption ti ṭhinte hi dimdawina tel miah loin, dan angin BJP sorkarna state dangte angin central agency hmangin kan hnungkhirh dawn a, zalen taka CBI an chêt theih nan hma kan lak dawn," a ti.

Vanlalhmuaka chuan, Covid-19 hripui chu sorkar laipui leh state dangte'n sum siam nan hmang loin, hmasawnna ruhrel siam nan an hmang tih CM Zoramthanga'n hria se a duh thu sawiin; CM Zoramthanga'n Covid-19 chhuanlama sum harsatna a sawi ṭhin chu thu belhchian dâwl lo a nih thu leh sum enkawlnaa a hlawhchhamzia a phatmarna mai a nih thu a sawi.

BJP President chuan, sorkar laipui leh India ram economy chu Covid-19 hripui léng avangin sum lamah a harsat phah tih a sawi rualin, "Hmasawnna kawngah a ṭhuanawp phah lo a, state hrang hrangte chuan financial management leh development management-ah nasa takin ṭan lâk nan an hmang a ni," a ti.

Vanlalhmuaka chuan, "Mipui hnena an intiamna tipuitling ṭhin sorkar, ṭhenawm state zawng zawngte'n an sorkartir mek BJP, Pu Modi-a kaihhruai hi kan state-ah hian sorkartir tur leh enchhin turin Mizoram mipuite kan national president Pu JP Nadda leh prime minister Pu Modi-a hmingin ka sawm a ni," tiin, kumina MLA inthlanpui awm turah BJP telna sorkar siam turin Mizo mipui a ngen a ni.