MPF leh political party-te thawhhona thuthlung a tlangpuiin pawm a ni

Mizoram People Forum (MPF) hruaitute leh political party hrang hrang hruaitute chu nimin khan Synod Committee Room-ah an inhmukhawm a, MPF president Rev. Dr Vanlalnghaka Ralte-in kaihruaiin, inthlana MPF leh political party-te thawhhona thuthlung chungchang an sawiho a, a tlangpuiin pawm a ni.

Ṭhutkhawmah hian, MPF leh political party-te thawhhona thuthlung atana rawtnate sawiho a ni a, a tlangpuiin an pawm. Rawtna awm sa bâk rawtna dang nei duh political party an awm chuan, January 2023 chhungin MPF-ah thlen ni se, an ti.

January 2023 chhunga rawtna a luh belh chuan a ṭul anga ṭhutkhawm leh ni se, an ti a; ṭhukhawm kher loa rawtna lut tharte siam rem theih a nih chuan, thawhhona thuthlungah telh mai ni se, an ti bawk. Thawhhona thuthlung hi peih a nih hunah MPF-in political party hrang hrangte pisaah kalin, party president ṭheuhte hming an ziah hnantir dawn a ni.

MPF president Rev.Dr Vanlalnghaka Ralte chuan, MPF leh political party-te'n thawhhona thuthlung an siam chu a hlawhtlin theih nan theihtawp chhuah tlang turin MPF-a tel páwl zawng zawng a ngen.

Nimina ṭhutkhawmah hian MPF Governing Board member mi 18 bakah, political party panga - BJP, MPCC, MNF, ZPM leh PC aiawh mi pahnih ṭheuh an tel a; MPF-ah kohhran páwl dang la tel lote an tel ve ngei theih nan MPF-in chak takin hma la se, tiin an rél bawk.

MPF hian November 29, 2022 khan Central YMA Committee Room-ah inthlana thawhhona thuthlung chungchang an lo sawiho tawh a ni.