Kohhran inzawmkhawm dan tur sawiho

Mizorama kohhran pawl panga aiawhte chu nimin khan Baptist Church of Mizoram (BCM) hmunpui, Serkawn, Lungleiah an inhmukhawm a, kohhran inzawm khawm dan tur an sawiho.

Sap Upa leh Pu Buanga Hall, Serkawna inràwnkhawmna hi BCM-in an thleng a; BCM bakah, Mizoram Presbyterian Kohhran, Evangelical Church of Maraland (ECM), Salvation Army leh Lairam Isua Krista Baptist Kohhran (LIKBK) aiawh mi paruk ṭheuh an tel a, BCM general secretary Rev. R Lalbiakliana'n inlawmna thu a sawi.

Inràwnkhawmna hi kum 2015-a Synod Inkhawmpuiin kohhran inpumkhatna an lo rèl tawh te, BCM-in kum 2021-a an Assembly-a Mizorama kohhran hrang hrangte inpumkhatna leh thawhhona ṭha neih zel theih nan Council of Churches in Mizoram din an lo rêl tawhte leh, kohhran páwl dangte pawhin Mizorama kohhran pawl hrang hrangte inzawm khawm dan an lo ngaihtuah tawh ṭhin bawhzuina a ni.

Nimina sawihonaah hian inpumkhatna pawl hming tur te, inzawm khawmna leh inpumkhatna kalpui dan tur te, bawhzuitu tur committee din chungchangte sawiho a ni. Sawihona leh ruahmannate chu kohhran páwl hrang hrangte'n an rorelna sang berah an thlen leh ang a, an remtih tlan chuan Mizorama kohhran pawl hrang hrangte inthlun zawmna tur din tum a ni.