KHAWTHLIR

Hripui vei ni 43 chhung hmu tawh lo
Mizoramah Covid-19 swab sample endik la awm reng mah se, ni 43 chhung Covid-19 vei hmuh chhuah a ni tawh lo a, ni 86 chhung hripui vanga thi an awm tawh lo. Covid-19 vei hmuh hnuhnun ber chu December 12 kha a ni a, December 13 aṭanga nimin thlengin hripui vei hmuh a ni tawh lo. Hripui vanga thi awm hnuhnun ber ṭum - October 29, 2022 hnuah hripui vanga thi an la awm leh lo bawk. Sample 19,93,208 endik tawhah Covid-19 vei mi 2,38,964 hmuh a ni a; mi 2,38,238 (99.7%) chu dam taka chhuakin, mi 726 (0.3%) an thi a ni.

Heroin man
Sairang Police Station-a police-te chuan January 23, Thawhṭanni tlai khan Sams Uddin (38) s/o Mahmed Ali leh Basit Uddin (34) s/o Nizam Uddin, Assam ve vete hnen aṭangin heroin kg. 1.356 an man. Heroin hi international market-ah cheng vbc. 6.78 hû a ni.

Quarters hawng
Lunglei District High Powered Committee (HPC) vice chairman Lawmawma Tochhawng, MLA chuan nimin zing khan Lunglei Chanmari-ah Irrigation & Water Resources executive engineer quarters thar a hawng. Quarters hi HPC sum nuai 37 hmanga sak a ni.

Ambulance hlan
Siaha bialtu MLA Dr K Beichhua chuan nimin khan a biala Chhaolo khaw mipui hman turin MLA fund aṭanga a lei ambulance (Eeco van) Chhaolo Joint VC hnenah a hlan. Nimin vêk khan Chhaolo khuaah hian Dr K Beichhua hmalaknain Siaha District Hospital-a thawkte'n free clinic an buatsaih a, damdawi ṭul angte chu MLA-in a fund hmangin a lei a ni.

SAWB thukhawm
Animal Husbandry & Veterinary minister Lalrinawma hoin nimin khan a pisaah State Animal Welfare Board an ṭhu. Dan hrang hrang an zir a; mipui hnena nungcha chunga ngilneihna lantir chungchang inzirtirna neih dan tur an sawiho bakah, Animal Welfare Board Executive Committee din an rêl.

Disaster training
Aizawl District Disaster Management Authority chuan nimin khan Taxation Auditorium-ah an hnuaia Incident Response System team member-te tan training an buatsaih a; sorkar department hotu te, pawl hruaitute leh chhiatna a thlena chhanchhuahna leh ṭanpui hna thawk tura che chhuak turte an tel. February 2, 2023-a Aizawl district-a earthquake mock drill neih tura inbuatsaihna an thlirho bawk.

Natural fibre zirho
Birla Cellulose leh Orient company-te chuan nimin khan Aijal CLub-ah 'Awareness programme on Birla Cellulose Natural yarn-Reishmi and Liva Branding' an buatsaih a, ZOHANDCO chairman C Lalrammawia leh Commerce & Industries joint director Lalṭanzuala ten an hmanpui. Natural fibre hman ṭhatna leh pawimawhzia zirho a ni.