Revised Online ILP Portal hawn a ni Kan inhumhim nan ILP a pawimawh - HM

Online hmanga inner line permit (ILP) dilna leh siamna portal thar, Revised Online ILP Portal Phase-I chu nimin khan Home minister Lalchamliana'n Secretariat conference hall-ah a tlangzarh. Minister chuan, ILP chu Mizote inhumhimna atan a pawimawh thu a sawi.

Home Minister chuan, ILP kenkawh kawngah rahbi thar chuàn kài a ni tih sawiin, "ILP hi hnam changkang zawk leh tam zawkte'n min chîmral loh nan British hoin kum 1873 khan min lo siamsak a ni. ILP hi kan inhumhimna atan a pawimawh a, kum 1986-a India sorkar leh MNF-te'n inremna thuthlung kan ziahah pawh Mizoram sorkar ráwn loin ILP hi hlih theih a ni lo tih a awm a, humhim turin kan ṭanrual zel a pawimawh," a ti.

Online ILP portal chuan kualzinte leh ILP mamawhte harsatna tawh ṭhin tam tak a chhâwk zângkhai dawn tih sawiin Lalchamliana chuan, "ILP khawihtute pawh a chhâwk zângkhai ngei a rinawm. ILP lâk ngai zingah khualzin tan sponsor neih a ngai lo a, hna thawk tur leh sumdawnna thila lo kalte tan sponsor neih a ngai," a ti a; sponsor-tute mawhphurhna leh tih tur chungchangah zirtirna inpek ṭhat a pawimawh thu a sawi.

Online ILP portal hman a nih hma chuan ILP zawng zawng office (pekna hmun bik)-ah pek ṭhin a ni a; Mizorama lut turte tan Mizoram House-ah emaw, checkgate-ah emaw, Lengpui Airport-ah emaw temporary ILP lâk a ngai ṭhin. Temporary ILP pek chhuahnaah khualzin tan rei tak tak nghah a ngai ṭhin a, harsatna an tâwk ṭhin a ni.

Khualzinte harsatna sutkian a nih theih nan Home department chuan Information and Communication Technology department nen ṭang dunin Online ILP portal an buatsaih a, December 16, 2019 khan Home Minister-in Police Headquarters-a Arya Mess-ah mipui hman theih turin a hawng tawh.

Online ILP portal hman a nih hnuah a ṭul anga tihchangtlun zel a nih laiin, Covid-19 a lên avangin March 2020 khan thlawhtheihna leh lirthei hmanga international leh inter-state inkalpawhna zawng zawng khâr a ni a, online ILP portal pawh tihtawp lailawk a nih bakah, ILP pek chhuah hrim hrim tihtawp a ni.

Covid-19 vanga inkhuahkhirhna hlih a nih hnu kum 2022 khan online ILP portal tharthawh leh a ni a, kum 2019-a hman online ILP portal chu changtlung zawkin thuam a ni.

www.ilp.mizoram.gov.in ah temporary ILP, temporary stay permit leh ILP exemption certificate dil theih a ni a; Home department-in an pawm hnuah online hmanga fee pekin, permit chu download theih nghal a ni.