Sorkar ṭha lo hrilhfiah nan MNF sorkar hi dictionary-a chuang tlâk a ni - MPYCC
Mizoram Pradesh Youth Congress Committee (MPYCC) chuan thuchhuah siamin, sorkar ṭha lo awmzia hrilhfiah nan MNF sorkar ding mek chu dictionary-a chuang tlak nia an ngaih thu an tarlang.
MPYCC chuan, MNF Ṭhalai president Dr L Thangmawia'n January 23, 2023-a Mizo Hnam Rûnah thu a sawiah, 'MNF hi Pathianin Mizote tana min pek a ni' a ti chu Mizoram mipui zahlohna leh pawisak lohna lian taka an ngaih thu an sawi a, "MNF an lan a piangin Mizoramah buaina leh manganna nasa tak a thleng ziah a, mipui dinhmun a derthâwng a, mipui an rûm ṭhin," an ti.
MNF sorkar chu hnam dang uchuak taka duhsak ṭhintu leh Mizoram mipui chan ái lâksaktu an nia sawiin MPYCC chuan, "Inthlana an intiamna, SEDP hmanga mipui bumtu an ni. Zalenna sual chhuanlama Mizoram chawk buaitu leh nunna tam tak ralna, tun thlenga mi rilru tinatu, piangsual leh ramtuileiloa siamtu an ni," an ti a; MNF vice president ṭhin Lalnunmawia Diary tun hnaia tlangzarh chuan MNF chêt dan a tilang a, mipui rilru a na thar hle niin an sawi.
MPYCC chuan, Congress party erawh chu Mizoram mipui tana ding a nia sawiin, "Mipui tana a tiamte pawh party thliar loin NLUP hmanga ṭanpui an ni a, mi tam takin eizawnna an neih phah. AMC inthlan hnuhnung bera MNF councillor (corporator)-a an dintir ṭhenkhat pawh NLUP dawnga eizawnna din thei an ni," an ti.