ZPM Ṭhalaite'n policy leh municipalities act an zirho

ZPM party chuan ZPM Ṭhalai Southern Headquarters pualin nimin khan Aizawla an party pisaah ZPM policy leh municipalities act chungchang zirhona an buatsaih a, ZPM Ṭhalai Headquarters leh ZPM Ṭhalai Southern Headquarters hruaitute telin, ZPM PAC member TBC Lalvenchhunga'n thil pawimawhte a hrilhfiah.

Zirhonaah hian ZPM Ṭhalai Head-quarters president Dr C Lalrammawia chuan thu sawiin, ZPM-in sorkarna a chan chuan ṭhalai, mahni kut leh kea dingchhuak thei turte dâwm kàn an ni dawn tih a sawi a, khawpui leh thingtlanga mipui sûkthlêk a inan deuh vek tawh thu sawiin, "Tun hnaia VC inthlanah pawh SEDP-in vote a lei theih lohzia a chiang a ni," a ti.

AMC corporator Baryl Vanneihsangi Tlau, ZPM general secretary Vanlalneiha leh ZPM Ṭhalai vice president Lalṭanpuia Zote ten thu an sawi bawk.