PUC-in Research Conclave an buatsaih

Pachhunga University College (PUC) chuan nimin khan an Seminar Hall-ah PUC Research Conclave 2023 an buatsaih a, Higher & Technical Education (HTE) minister Dr R Lalthangliana'n a hawng.

Dr R Lalthangliana chuan, PUC-in research scholars 61 an nei thei chu ropui a tih thu sawiin, "Thla tin international research paper tichhuak thei institution a nih avang leh kum ruk kal ta chhunga journal leh lehkhabu publication 750 chuang in nei thei hi hlawhtlinna ropui tak a tling," a ti.

HTE Minister chuan, PUC chu central university a nih angin, tun hnaiah faculty ṭhahnem tak lak a nih thu sawiin, "Post 120 awm zinga 118 hnawhkhah theiha a awm hi a lawmawm tak zet, " a ti a; NAAC accredited A++ hmu thei tura ṭang sauh sauh tur leh research project 40 kal mek leh research proposal an neih zawng zawngah duhsakna a hlan.

Inkhawma tarlan danin, PUC hian khaw pali - Phulpui, Lungleng leh Dulte adopted village-ah thlangin an enkawl tawh a, tunah Khawrihnim chu adopted village-ah an hmang leh mek. Adopted village enkawlna atan PUC-a thawkte'n pawisa an thawh khawm a, life skill, college admission leh thil dangahte awareness campaign leh tlawhchhuah hun an hmang ṭhin a ni.