Sangha chi laklet tir

Fisheries minister K Lalrinliana chuan nimin khan Serlui B tuikhuaha Fisheries department-in Fish Cage Culture an siam a tlawh a, cage-a dah tur sangha chi chu a nih tur ang a nih loh avangin supplier-te chu an sangha chite hi lakir leh vek turin a hriattir. 

K Lalrinliana chuan sangha chi supply reng reng a nih tur ang zel supply a nih loh chuan pawm a nih dawn loh thu sawiin, "Sangha supply kalphung pawh thlak danglam tum a ni. Sum tam tak senga hmalakna hi hlawhtling ngei se ka duh. Supplier-te'n sangha chi a nih tur ang ngei an supply loh chuan pawm a ni lo," a ti.Sangha dila sangha chi supply pawh a man tlawmin supplier-te'n supply an chan ngei theih nan tlawm deuh deuhin an chhang 

ṭhin tih sawiin Fisheries Minister chuan, "A hnuah sangha chi len zawng chungchangah harsatna an tawk leh ṭhin," a ti a,  Rs. 3 aia tlawmin sangha note supply chhan phal a nih tawh dawn loh thu a sawi.

Supplier ten sangha note an supply theihna aia tlawm Rs. 1.50 te a sangha chi supply an chhan ṭhin avangin a nih tur aia te an supply leh a, supplier-te khawngaihna leh hriatthiamnin depart­ment lamin an lo en leh ṭhin avangin Sangha khawi­tu­ten an chanvo tur an chang thei lo tih sawiin, "Chu­vangin hetiang supply system hi tihbo vek tum a ni," a ti Fisheries department chuan Serlui B tuikhuaha Fish Cage Culture dah ṭawl tawh 23 chu blue revolution a sum hman bang hmangin an thuam ṭha a, cage 23 ah hian nimin khan Fisheries Minister hoin sangha note chhuah tumin official te nen an kal a, sangha chi chhuah turte chu a enchian hnuah a tet lutuk avangin chhuah a ni lo.