R-Day lawmna hmun bul hnaiah Drone thlawhtir phal a ni lo

Naktuk hian India ram pumah Republic Day lawm a ni dawn a, Mizoramah pawh district khawpui tinah leh hmun dang ṭhenkhatah lawm a ni dawn. Aizawla R-Day lawmna bul hnai boruakah drone leh a kaihhnawih thil reng reng thlawhtir phal a ni lo.

Republic Day hi Mizorama hmanna pui ber Aizawlah chuan Lammualah lawm a ni dawn a, Governor Dr Hari Babu Kambhampati-a'n hnam puanzar a pawt pharh ang. District khawpuiah chuan bawrhsap hoin lawm a ni dawn. R-Day ah hian national/state award te, Mizoram Cleanliness Competition 2022 lawmman leh lawmman dangte sem a ni ang.

R-Day ni hian zing ni chhuah rualin sorkar inahte hnam puanzar zâr a ni dawn a; Lammuala lawmna chu LPS Vision leh ZONET Cable TV-ahte live-in pek chhuah a nih dawn bakah, AIR Aizawl Station pawhin live commentary an ti dawn a ni.

Aizawl DC Dr Lalhriatzuali Ralte chuan thupek chhuahin, R-Day lawm a nih dawn avangin vawiin leh naktukah Lammual, Raj Bhavan leh Chief Minister's Office leh bangla chungahte remote control hmang drone/aerial camera leh a kaihhnawih thil thlawhtir khap a nih thu a puang.

Thupek bawhchhiaa drone thlâwk a awm chuan kah thlak emaw, man emaw theih a ni a, dan anga hrem theih a ni bawk.