Primary school-a Hindi zirtirtu tur Central-ah kan dil mek - Education Minister

School Education minister Lalchhandama Ralte chuan, primary school-ah Hindi ṭawng zir a nih theih nan sorkar laipuiah P/S-a Hindi zirtirtu tur dil mek a nih thu Mizoram Hindi Prachar Sabha (MHPS) hruaitute a hrilh.

MHPS chairman RB Lalmalsawma chuan January 23, Thawhṭanni zan khan Education minister Lalchhandama Ralte chu a inah a hmu a, Mizorama Hindi zirna hmasawnna turte a thlen a ni.

RB Lalmalsawma chuan, School Education department-a Hindi Wing deputy director-in a awp mek chu joint director-ah tisang tur te, Hindi zirtirtu nghet post hnawhkhah loh tam tak hnawhkhat tur te, CSS hnuaia Hindi teacher post la hnawhkhah loh hnawhkhat thuai turtein Minister a ngen.

MHPS Chairman chuan, MHPS-a thawkte'n hlawh rei tak an lâk tawh loh thu sawiin, hlawh pe chhuak thuai tur leh thawktu dah belh turin Education Minister a ngen a; thawktute ṭha taka hlawh pek theih a nih loh chuan Hindi board exam result chhuah hun a khaihlak phah theih thu a sawi.

Minister chuan, Hindi chu Mizote'n an thiam ngei a pawimawh thu sawiin, hmalakna a bawhzui mek thu a sawi a, "P/S-ah Hindi zir a nih theih nan sorkar laipuiah P/S Hindi teacher dil mek a ni a, a hlawhtlin ngei ka ring," a ti a; Mizote'n Hindi zir an uar a ṭul thu leh Mizoram Education Services Rules buaipui mek a nih thu a sawi bawk.