Dr K Beichhua leh MDC pakhat MNF aṭanga chawlhtir an ni; MLA-ah din leh ngei ka tum - Dr K Beichhua

MNF party chuan nimin khan Siaha bialtu MLA Dr K Beichhua leh Mara Autonomous District Council (MADC) MDC N Viakhu chu MNF aṭangin an chawlhtir. Dr K Beichhua chuan kumina MLA inthlan lo awm turah MLA-ah din leh ngei a tum thu a sawi.

MNF president Zoramthanga chuan Dr K Beichhua, MLA leh N Viakhu, MDC te MNF aṭanga chawlhtirna lehkha ti chhuakin, party dan kalha an chet avangin MNF party dan bu bung 15 chang 67 tlawhchhanin, MNF party primary member aṭanga chawlhtir an nih thu a tarlang.

Vanglaini palai zawhna chhang­in Dr K Beichhua chuan an party dan bawhchhiatna a neih a hriat loh thu a sawi a, "An zawng lui ngar ngar a nih erawh chuan min puhna turte chu an hre mai thei," a ti.

Dr K Beichhua chuan minister of state aṭanga bantir a nih hnuah kumin kumtir aṭangin a bial a fang tih sawiin, "Ka bial mipuite'n min tawrhpuia, party party sawi loin min lo lainat ve a ni," a ti a, a kalna apiangah lainattu ṭhahnem tak a neih thu a sawi.

Siaha bialtu MLA chuan minister of state aṭanga ban a nih chungchangah tumah a dem loh thu sawi nawnin, "Ka bial ka fanna-a ka thusawi zawng zawng pawh hi ngaithla lêt vek se, mi ka demna engmah an hre lo ang," a ti.

MLA inthlan lo awm turah din a tum leh tum loh zawhna chhangin Dr K Beichhua chuan, "Din leh ngei chu ka tum," a ti a, tun dinhmunah chuan political party zawm chungchangah ngaihtuahna a la sèn loh thu a sawi.

Tarlan tawh angin, MNF ticket-a Siaha bial aṭanga MLA atana ṭum hnih thlan tlin tawh Dr K Beichhua hian December 13, 2022 khan Chief Minister thu angin minister of state aṭanga bânna a lo thehlut tawh a ni.