Kolasib MJA-in khawmpui an hmang
MJA, Kolasib district chuan nimin khan Kolasib Press Club-ah Annual Conference an hmang a, IPR minister Lalruatkima khuallian niin, MJA Gen. Hqrs president C Lalrambuatsaiha khualzahawm a ni.
Lalruatkima chuan ziak mite an hlut thu sawiin, "He khawvela an awm tawh loh hnuah pawh an sûlhnu hmuh tur a awm reng ṭhin. Tunlaiah lehkha chhiar tam kan inzirtir a ṭûl ta hle mai, ṭan kan lâk tlàn a ngai. Kan thiamna leh theihnate tihpun zel hi kan tih ngei ngei tur a ni," a ti.
Journalist nihna chu hna zahawm a nih thu sawiin IPR Minister chuan, "Kan ram tan ro hlu an ni. Dikna leh rinawmna chawi sang a, dik tak leh rintlaka mite hnena thu puangzartu an ni. Mite tibengvartu an ni a, dik tak leh rintlaka an thawh a ngai," a ti a, journalist tan chuan huaisen, taimak, tei rei peih a ngaih thu a sawi.
IPR Minister chuan freedom of speech and expression a awm rualin, fundamental duties a awm tih hriat a ṭul thu sawiin, "Tih tur leh mawhphurhna kan nei a, mi dangte tibuai leh harsatna siam zawnga hman tur a ni lo. Zalenna hian mawhphurhna a keng tel a ni. Ram din-hmun kengtu an nihna lai a awm," a ti.
Lalruatkima chuan sorkar chu sawisel ngam tur a nih thu sawiin, "Ṭhat lohna lai kan nei vek. Kan ṭhat lohna leh dik lohnate miin an sawisel ngam loh chuan dictator kan ni tihna a ni," a ti a, mipui leh ram hmasawnna tur ngaihtuah chunga editorial ziak ṭhin turin MJA member-te a chah.
MJA president C Lalrambuatsaiha chuan chanchinbu mite chu ṭang lehzual tura fuihin, "New media, social media-ten min tibuai ta viau a, thing tlu kar nun, an tih ang deuh kan nihna laite pawh a awm tawh. Tuna kan awm dan ang ringawta awm loin, eng emaw talin hma kan lak belh a, ke kan pen belh a ngai, ṭan kan lak lehzual a ngai ta. Hei hi kan dam khawchhuahna tur a ni," a ti.
Kolasib MJA inkhawmpuiah hian chawhma lamah president Andrew Vanlalauva kaih-hruaiin rorel a ni a, chawhnu lamah conference pualin inkhawm a ni. MJA Gen. Hqrs hruaitute'n an hmanpui a, tlaiah zanriah kilho a ni. Kolasib district-ah hian MJA member 15 an awm mek a ni.