KHAWTHLIR

OSD to CM-in bânna thehlut
Mizoram sorkarin officer on special duty (OSD) to chief minister atana a dah Rosangzuala chuan nimin khan bânna a thehlut. Thudawn danin, Rosangzuala hian chief minister Zoramthanga thurâwn angin OSD to CM aṭanga bânna hi a thehlut a ni. Rosangzuala hi September 14, 2021 khan OSD to CM atana ruat a ni a, Mizoram sorkar hnuaia secretary rank-ah dah niin, a hlawh chu thla khatah Re. 1 a ni.

Nurse vailiam
Labour, Employment, Skill Development & Entrepreneurship (LESDE) minister Lalchhandama Ralte chuan nimin khan Japan rama nurse care hnathawk tura thlan Mizo ṭhalai, Delhi-a Japanese ṭawng zir tur mi 14 a vailiam. Mizo ṭhalai 14 te hian thla kaw chhung Delhi-ah Japanese ṭawng an zir dawn a, an zirna senso hi National Skill Development Council-International (NSDC-I) in a tumsak a ni.

Minister-in tlawh
Excise minister Lalrinawma chuan nimin khan Excise Commissioner Office, Aizawl District Excise Office, Rangvamual Outpost leh Bawngkawn Excise ramte a tlawh a; Social Welfare Board vice chairman K Liantlinga, Excise & Narcotic secretary KT Beichho leh Excise department hotute'n an ṭawiawm.

DC-in endik
Khawzawl district bawrhsap CC Lalchhuangkima hoin nimin khan NHIDCL leh kawng siamtu company hotute'n Khawzawl leh Champhai inkar national highway (NH)-6 kawngpui siamtu Shri Balaji Construction Company (BCC) te hmalakna an endik a; hna tlo leh ṭha chak taka thawh leh hun bituk chhunga zawh ngei theihna tura ṭanlak chu sorkar duh dan a nih thu a sawi.

Training buatsaih
SIRDPR conference hall, Durtlangah nimin aṭang khan Social Audit Resource Persons mi 30-te tan training buatsaih a ni a, SIRDPR director Lalhmunsanga Hnamte in a hawng. Training hi ni 30 chhung awh tur niin, Feb. 25, 2023-ah zawh a ni ang.