Sum seng tlem zawk, buhfai ṭha zawk si mipui sem dan tur ka hria - Lalrindika

Nimin khan MPCC-te chuan an pisa-ah buhfai chungchang sawihona hun an buatsaih a, a sawihawngtu Lalrindika Ralte, MLA chuan sum seng tlem zawk leh buhfai ṭha zawk mipui hnena pek dan tur a hriat thu a sawi.

Lalrindika Ralte chuan, Congress sorkar lai khan buhfai subsidised nan hian thla khatah cheng vbc. 10 dawnlai senral ṭhin a nih thu sawiin, "Ngun taka ka zirna aṭangin hei hi tih tlem theih niin ka hria a ni. Sorkarin economic cost-in buhfai a lei ṭhin a, a duh chuan open market aṭangin man tlawm zawkin a lei thei tih ka hria a, sorkar hotute dawrin, theihtawpin hma ka la a ni," a ti.

Sorkarin economic cost-a FCI aṭanga a lei ṭhin aia tlawmin dan ang thlapin open market aṭangin a lei theih ta tih sawiin Lalrindika Ralte chuan, "Hei hi politics-a inpuhmawhna a awm ṭhin. Keiman ka supply zui tâk avangin sorkarin keimah min duhsak bik angin an sawi ṭhin a, mahse a ni lo tih ka sawi duh," a ti a, duhsak bik vang ni loin, man tlawm zawka a pek theih vanga supply a nih thu a sawi.

MLA chuan hriatna leh thiamnate ram leh hnam tan leh mihring puite tana hlawk zawk leh ṭha zawka hman tur a nih thu sawiin, "Kan finna leh mi aia kan sannate hi mahni hma sialna tur a ni lo. Pathian zarah Congress-in sorkarna kan chang a nih chuan ṭha zawk, sorkarin sum a sen tlem zawkna tur leh mipui hlimna tur zawka mipuia buhfai pek dan tur kan hria,” a ti.

Buhfai buk chu a tling tur a nih thu sawiin Lalrindika Ralte chuan, "Mipuite'n an chan tur an chang kim lo hi a dik lo a ni. Buhfai hi sorkarin a tlinga kan lei a nih chuan a tlingin mipuiah kan pe tur a ni. Mi thlaa an inkah kai tawh laia buhfai a buk tling loa lo la sem ringawt pawh hi a dik thei lo, kan theih loh hi a te lutuk," a ti a, thil dik lo chu huat tur a nih thu a sawi.