Tourism movement hi hnam movement a ni - Tourism Minister

Tourism department chuan nimin khan an directorate tualzawlah National Tourism Day an hmang a, Tourism minister Robert Romawia Royte in a hmanpui. Minister chuan, "Economy ṭhanlenna tur atana thil pawimawh tak a nih avangin tourism movement hi hnam movement a ni," a ti.

Robert Romawia Royte chuan, Mizoram chu ram nuam, mawi leh muanawm, zin mite'n an hmuh chak leh tlawh chak ram a nih thu a sawi a, "Mizoram sorkar leh mipuite pawh khualzin mite tan englai pawhin an inhawng reng a, amaherawh chu a tlawh chak tute leh tlawh turate inkara suihzawmtu kan la nei ṭha tawk lo. Economy ṭhanlenna tur atan thil pawimawh tak a nih avangin tourism movement hi hnam movement a ni," a ti a, Mizoram tourism ṭhanlenna tur leh tilar turin Tourism department bakah, travel agent, tour operators, social media influencers leh mipui mimir an pawimawh thu a sawi.

Tourism Day hmanna inkhawm hi Tourism secretary Manisha Saxena-i'n a kaihruai a, Mizoram sik leh sa nawmzia te, a hmun mawizia leh zin mite tana en tur leh tlawh tur a tam thu te sawiin, "Tun dinhmuna kan mamawh ber chu khualzin mite hnena zawrh chhuah dan kan thiam a ngai a ni," a ti bawk.

He hunah hian Tourism deputy director Rachel Lalrinhlui kaihhruaiin kalkhawmte chuan responsible tourism pledge an sawi rual a; Mizoram University hnuaia Department of Hospitality and Tourism Management assistant professor Dr Pankaj Kumar pawhin thu a sawi.

National Tourism Day pual hian Hospitality & Tourism Management department, MZU a zirlaite leh Tourism department hnuaia thawkte chuan nimin khan Khawhpawp thenfai hnatlang an nei a, heta kal turte hi Minister hian a vailiam nghal a ni.