Minister-in HOUSEFED pisa a hawng

Cooperation minister C Lalrinsanga chuan nimin khan New Capital Complex-a MIZOFED office-ah Mizoram Housing Cooperative Federation Ltd (HOUSEFED) pisa thar a hawng.

C Lalrinsanga chuan, hun rei tak hnuah HOUSEFED tihnun thar leh a ni chu lawmawm a tih thu a sawi a, "In lakah beiseina sáng tak ka nei. Cooperative movement hi ṭangkai taka kan hman thiam a ngai a, mipuite mamawh phuhruk kawngah cooperative society hrang hrangte'n tun aia nasa lehzuala ṭan in lâk a ngai," a ti a, cooperative movement tih chak kawngah society hrang hrangte an ṭanrual a pawimawh thu a sawi.

Mipui mamawh phuhruk kawngah cooperative society-te chu an mit leh beng chhi uluk tura chahin Minister chuan, "Hmathlir thui tak nei chunga hmalak a pawimawh ṭhin a, a bik takin mi harsa leh retheite ngaihtuah reng chunga ruahmanna siam a pawimawh," a ti bawk.

Commerce & Industrial Development Board vice chairman K Laldawngliana, MLA pawhin thusawiin, HOUSEFED chu midangte tana malsawmna thlentu, a bik takin thingtlang lama mirethei in nei lote tana hlimna leh lawmna thlentu ni turin duhsakna a hlan a ni.

HOUSEFED hi primary multipurpose cooperative society 10 – Ramhlun Vengthar Multipurpose Cooperative Society, Ramhlun South Multipurpose Cooperative Society, Sihphir Multipurpose Cooperative Society, Sihphir Venghlun Multipurpose Cooperative Society, Sihphir Women Multipurpose Cooperative Society, Saron Veng Multipurpose Cooperative Society, Nursery Veng Multipurpose Cooperative Society, Luangmual Multipurpose Cooperative Society, MIZOFED Employees Multipurpose Cooperative Society leh Bawngsa Zuar Multipurpose Cooperative Society-te'n July 26, 2022 khan an din a, November 25, 2022 khan registration certificate an nei a ni.

Pisa thar hawnna inkhawm hi HOUSEFED chairman Lalzahawma Khiangte in a kaihruai a; Mizorama cooperative society hrang hrang hotute an tel a ni.