Taxation minister Lalchamliana chuan nimin khan Mamit Dinthar Vengah Taxation office thar a hawng. Minister chuan, sorkarin amaha pawisa a neih loh avangin chhiah pek kawngah mipuite'n rilru zau leh puitling tak nei se a duh thu a sawi.
Lalchamliana chuan, mipuiin chhiah pek kawngah an rilru an tihdanglam ṭul a tih thu a sawi a, "Sorkarin amahin pawisa a nei lo a, mipuite aṭanga chhiah hrang hrang khawn aṭangin sum a nei chauh tih hrereng i la. Mipuite'n kan rilru put hmang kan tihdanglam a ṭul. Chhiah pek kawngah rilru zau leh puitling tak kan put a ngai a ni," a ti.
14th Finance Com-mission hnulamah sorkar laipui chuan deficit grant a pe tlem tial tial tih sawiin Lalchamliana chuan, "Zawi zawia mahnia intodelh a, mahni ke-a din a lo ngaih tak avangin chhiah lakna kawnga a department neitute chuan theihtawpa ṭan a ngai lehzual dawn," a ti a, Mamitah Taxation office thar an nei chuan phurna thar pe se a duh thu a sawi. 
Minister chuan Taxation department chu Mizoram sorkar tana sum khawntu ber a nih angin tunah hian GST bakah chhiah chi hrang hrang khawn mek a nih thu a sawi a, "Vaibelchhe 730 chhiah khawn tura sorkarin min tuk chu thla kua chhung lekin vbc 717 kan khawn tawh a, hetiang a nih tak avang hian sorkarin kan target chu cheng vbc 900-ah a tipung," a ti a, sorkarin an target a tihpun chu tlin ngei tura theihtawp chhuah turin thawktute a chah.
Taxation office thar hi cheng nuai 328.53 senga sak a ni a, contractor chu H Rohmingthanga, Mamit Lungsir a ni. October 31, 2019 aṭanga sak ṭan niin March 30, 2022-ah sak zawh a ni.