Gas leh a kaihhnawihte endik dawn

Mizorama Indian Oil Corporation Limited (IOCL) hnuaia eirawngbawlna gas nei zawng zawngte chu kum nga chhungin vawi khat tal endik (mandatory inspection) a ni tawh dawn a; endikna man hi GST telin free connection-ah Rs 59 leh connection pangngaiah Rs 236 a ni ang.

Food, Civil Supplies and Consumer Affairs (FCSCA) department chuan, IOCL hotute'n LPG Manual version 2.0 clause 5.3 in a phut angin IOCL hnuaia LPG connection (domestic) neite hnenah mandatory inspection, kum nga chhunga vawi khat tal neih ṭhin tur chu Mizoram chhungah kalpui ṭan turin ruahmanna an siam tih a tarlang.

FCSCA chuan, "Hei hian a tum chu eirawngbawlna gas hmangtute'n pipe hman tur dik tak an hman leh hman loh te, gas búr (cylinder) hman dan dik leh connection dik takin vuah (fit) a ni em, tih te leh ISI mark chuang thuk (gas stove) hman a ni em, tihte endik a ni," a ti.

FCSCA tarlan danin, mandatory inspection hi ṭul ti lo leh tih tir duh lo tan form awmsa hmangin declaration-ah hming ziah tur a ni a, endik duh lo, declaration-a hming ziak duh lo bawkte chu eirawngbawlna gas an dawng chhunzawm lo a nih pawhin an sawi buai thei lo ang.

Mandatory inspection ti tura kalte (mechanic) hian mipuite'n an hriat theih nan uniform hain IOCL ID an nei ngei tur a ni bawk.