Republic Day vawi 74-na lawm a ni

Nimin khan India ram pumah India ramin danpui a hman ṭanna ní, Republic Day vawi 74-na lawm a ni a, Mizoramah pawh hmun hrang hrangah lawm a ni. Mizorama lawmna pui ber, Lammualah chuan zing dar 8-ah hun hman ṭan a ni a, Governor Dr Hari Babu Kambhambati-a'n hnam puanzar pawt pharhin, parade contingent-te'n hnam puanzar chibai an bûk a chháng lêt.

Governor chuan, Zoram mipuite R-Day duhsakna chibai a bûk a; zalenna sualtute inpekna avangin India ram khua leh tuite'n danpui an nei tih sawiin, "Kum 1950 vawiin ní angah khan khawvela mipui sor­kar ram lian berte zinga chhiar tel ni turin India danpui kan nei a, he danpui hian ram khua leh tui zawng zawngte tan dikna, zalen­na, intluktlanna min pek bakah, ei leh bar intodelhna leh mipa leh hmeichhe intluktlanna thlengin kawng min hawnsak a ni," a ti.

Hari Babu Kambhambati chuan, dan loa ramsa tawlhrûk 468 man a nih thu sawiin, Mizoram himna tura dan leh thupek kengkawhtu hrang hrangte chungah a lawm thu a sawi a; dan bawhchhiatna zawng zawng tih tawp theih ni lo mah se, Mizoram police-te thawhrimna avangin Mizoram chu India rama state ralmuang ber zinga mi a nih thu a sawi.

Tlawmngai pawl, kohhrante leh mipui zarah sorkarin Mizoram hmasawnna tur chak takin a thawk mek tih sawiin Larsap chuan, "Socio Economic Development Policy (SEDP) kaltlangin Mizoram sorkarin hmalakna pawimawh tak takte a kalpui chhunzawm zel a ni," a ti.

Governor sawi danin, SEDP hnuaia sum faia ṭanpuina pek (family oriented)-ah Commerce & Industries department-in mi 13,266 hnenah Rs 25,000 ṭheuh an pe tawh a; Horticulture department-in mi 4,078 hnenah Rs 25,000 ṭheuh an pe tawh. Fisheries department-in mi 1,261 hnenah Rs 25,000 ṭheuh an pe tawh bawk.

Republic Day lawmnaah hian parade contingent 26 an tel a, parade commander Pukhraj Kamal, IPS, Aizawl Addl SP leh second commander CS Lalrinzuala, 1st IR ten an kaihruai. State páwn aṭangin Sikkim Police an tel a, police ui fingte telna Mizoram Police Canine Squad pawh telin, an tel vawi khatna a ni.

Governor hian R-Day lawmna parade-a ti ṭha te, Mizoram Police leh Excise & Narco­tics-a thawk ṭha chawimawina te, khaw fai intihsiak lawmmante a sem a ni.