Hrianghmun khuaa in panga kângah Rs 38,89,250 vel hù a kâng chhia

January 25, Nilaini chawhnu lam khan Hrianghmun khuaah in panga a kâng a, in panga zinga pali chu kàng ralin, pakhat erawh chu a kan ral hmain ṭhelh mih a ni. Chhiatna thlengah hian Rs 38,89,250 vel hù a kâng chhia.

Hrianghmun khaw­tlang hruaitute sawi danin, kângmei hi chawhnu dar 1:40 vela chhuak niin, Khamdopaua in aṭanga chhuak a ni a, an ṭhenawma inte a kâng kái a ni. Khamdopaua in bakah, Pausianliana in, Chineni in leh Liandala in a kâng ral vek a; Kai­tuanga in pawh kâng hman mah se, a kan ral hmain mipuiin an ṭhelh mit hman thung.

Kângmei chhuakah hian tractor pakhat a kan chhe vek a, vawk pali a kan hlum bakah, pathum dang a kâng hliam a, buh ṭin 700 vel a kâng chhe bawk. In, bungrua leh ran kang chhia zawng zawng hi Rs 38,89,250 vel hùa chhût a ni.

Hrianghmun khuaa chhiatna thleng hi bialtu MLA Dr L Thangmawia chuan Nilaini zan khan a pan nghal a, chhiat tâwk chhungkuate tlawhin, sorkar anga tih theih awm apiangah theihtawp chhuah a nih tur thu a hrilh. In kâng ral vek chhungkaw pali hnenah Rs 5,000 ṭheuh leh in kâng ral lo chhungkaw pakhat hnenah Rs 2,000 a pe a; tarpauline pakhat ṭheuh a pek bakah, khawtlang hruaitute hnenah hna­tlangte ei leh in senso atan Rs 3,000 a pe bawk.

Hrianghmun khaw­tlang hruaitute chuan, an khawtlanga chhiatna thlengah Mimbung leh Teikhang khaw mi te, Ngopa RD Block VC Association, Mimbunga awm 2nd Assam Rifles, Saitual DC, Ngopa BDO leh Ngopa police-te aṭangin puihna an dawn thu an sawi.