KHAWTHLIR

Governor's At Home
Governor Dr Hari Babu Kambhampati chuan Republic Day vawi 74-na pualin nimin chhun dar 11 khan Raj Bhavan tualah thingpui inhona hun, At Home a buatsaih a; sorkar hotu lute leh sàwm bik mi eng emaw zat telin, thingpui an inho a ni.

MLA-in hmanpui
Aizawl North-II bialtu MLA Dr Vanlalthlana chuan nimin khan a bial chhunga Ramhlun Venglai Branch MHIP-in an kum 25-na, silver jubilee an lawmna a hmanpui a, jubilee souvenir a tlangzarh. MLA chuan, insurance policy siam kawngah nasa lehzuala ṭang turin a fuih.

Ranglong festival
Ranglong Youth Association (RYA) chuan January 25, Nilaini khan Noagang, North Tripura-ah Ranglong Khawhui Traditional, Cultural & Food Festival an buatsaih a, Tripura, Mizoram, Assam leh hmun hrang hrang aṭangin Ranglong hnam ṭhahnem tak an tel. Kût hi MZP hruaitute'n an president Lalnunmawia Pautu hoin an hmanpui a ni.

Police-in ngen
Mizoram Police chuan pawisa hlawhna tur emaw, rinhlelh loh vang ringawtin emawa mi ipte leh bungruate kensak/kawlsak lo turin mipui an ngen a, "Ruihhlo, puak thei thil, thil rûk leh dan phal loh thilte a lo ni thei a, i tihsual ni miah loah hremna i tâwk thei. Hetiang thila rinhlelh i neih chuan police-ah hriattir vat la, lawmman pek i nih bakah i nihna thup a ni ang," an ti.

Zarkawt pheiah tlân theih dawn loh
Naktuk zing dar 7 aṭanga January 30, Thawhṭanni zing dar 5 inkarah Zarkawt pheia ICICI Bank bul kawngpuiah pipe phûm a ni a, hei vang hian Zarkawt kâwn leh Chanmari inkarah lirthei tlân theih a ni dawn lo tih Traffic SP Rodingliana Chawngthu-in a tarlang. Lirthei tê chi tan Thingpuihuan Tlang (MacDonald Hill) lamah kal theih a ni a; city bus-te chhim lam aṭanga tlânte chu Zodin Square (AR Mandir)-ah kual let tur niin, hmar lam aṭanga tlânte chu Chanmari kâwnah kual lêt tur a ni.