MSSSB chairman bàn an phûtnaah MZP-in sorkar aṭangin thu an la hmu lo

MZP General Headquarters chuan Mizoram Subordinate Services Selection Board (MSSSB) chairman Ramhmangaiha Ralte, January 2023 chhung ngeia bàn tura sorkar an phût chungchangah Mizoram sorkar aṭangin thu dawn an la nei lo.

Vanglaini palai zawhna chhangin MZP president Lalnunmawia Pautu chuan, an thil phûtah sorkar aṭanga thu dawn an la neih loh thu a sawi a, "Kan hun tiam chhunga MSSSB Chairman bàn a nih loh chuan meeting-a kan lo rèl tawh angin MZP chuan hma kan la ngei ngei dawn," a ti.

MZP President sawi danin, January 2023 chhunga MSSSB Chairman an phût thu hi Chief Minister leh Deputy Chief Minister hnenah ziakin an thlen a ni. Bàn tura an phût hma hian MSSSB Chairman chu sorkar hna thawktu tur an lâk danah an lungawi loh thu an hrilh tawh a, mahse, an ngennate a zâwm duh lo a ni.

January 20, 2023-a MZP hruaitute ṭhukhawm chuan, MSSSB-in Mizoram sorkara thawk tur tun hnaia an lâkah hnam dang an tling fo chu hriatthiam har an tih thu an tarlang a, January 2023 chhung ngeia MSSSB Chairman bàn turin Mizoram sorkar an phût a ni.

MZP chuan, MZP ngenna ngai pawi­mawh loa MSSSB-in tun hnaia hna lakah hnam dang an tling fo chu hriatthiam har an tih thu sawiin, "Mizo zirlai leh hna zawng mekte tana him tur MSSSB dan (Recruit­ment Rules) siam a nih theih nan hmalak a, kan ngenna a hlawhtlin loh chuan, MSSSB titawp tura hmalak ni se," an ti.