Myanmar sipai bomb thlakah Thu dawn a la awm lo
Home minister Lalchamliana chuan, Myanmar sipaite'n jet fighter hmanga Ṭiau lui kama Chin National Army (CNA) camp a beihnaah Mizoram (India) chhungah bomb a tla nia sawi chungchangah sorkar laipui aṭangin thu dawn an nei lo tih a sawi.
Vanglaini palai zawhna chhangin Home Minister chuan, Myanmar sipaite bomb thlak chungchangah thu dawn an la neih loh thu a sawi a, "Document base-in an kal ṭhin a, Champhai DC report-ah chuan Mizoram (India) chhungah a tla lo a ni. Chu bakah, intelligence hrang hrang an nei a, chung ho report-te chu an thlir ang," a ti.
Tarlan tawh angin, Myanmar sipaite'n January 10, 2023-a CNA camp an bomb ṭumin Mizoram chhungah bomb pakhat a tla niin Farkawn khawtlang chuan an ngai a, Ṭiau lui kama ding lirthei pakhat a chhiat bakah, bomb keh them an chhar a ni.
Mizoram chhunga bomb tla nia sawi chungchangah hian Champhai DC chuan Mizoram sorkarah report a thehlut tawh a, report chu Khawbung BDO-in a hmuna a enfiahna report behchhana siam a ni.
Champhai DC tarlan danin, Myanmar sipaite'n January 10, 2023-ah bomb panga an thlâk a, a tuk January 11-ah bomb pathum an thlak leh bawk. January 10-ah hian bomb emaw, a siper emaw chu Ṭiau luiah a tla ngei a, chumi nghawrah chuan a bul hnaia awm truck pakhat darthlalang a chhe nual a ni.
Ṭiau lui hi India leh Myanmar inrina lai taka awm a nih avangin Mizoram (India) lei-lungah a tla tih fiahna chat a awm lo a; bomb tla siper chu Mizoram chhung lam metre 20 velah hmuh tur chu a awm a ni.