Hmun hrang hrangah Republic Day hman a ni

Nimin khan Mizoram hmun hrang hrangah Republic Day vawi 74-na lawm a ni a, district khawpui (headquarters)-ahte chuan bawrhsap (district commissioner)-te khuallian an ni.

LUNGLEI

Republic Day hi Lungleiah chuan Ṭhuamluaia Mualah lawm a ni a, bawrhsap Kulothungan A-in hnam puanzar pawt pharhin, parade contingent 23 - armed contingent pathum, unarmed contingent pakua, school contingent 11 bakah, 3rd Naga AR Pipe Band leh Govt High School Pipe Band-te'n hnam puanzar chibai an bûk a chháng lêt.

Parade-ah hian pakhatnate chu unarmed-ah Sacred Heart HSS Student Police Cadet leh school contigent-ah Adventist English School an ni a, lawmman hlan an ni. UDPA hnuaia Lunglei Cleanliness Competition 2022-a pakhatnate - veng fai berah Salem Veng, sorkar pisaah IPR office, bazarah 3-Gate Bazar, sikulah Rahsi Veng M/S-II, zirna-inah HATIM, hotel-ah Tourist Lodge, damdawi-inah Sazaikawn UPHC leh, faina lama thawk ṭha ber Vanlalvuana leh Lalhmingsangi te hnenah chawimawina hlan a ni.

Subedar Pyare Lal, 3rd Naga Bn. AR hnenah President Police Medal for Meritorious Service hlan a ni a, Serte Anganwadi Centre I-in Nutri Garden Award an dawng. 3rd Naga Bn AR-in mi paruk hnenah wheelchair leh crutch an hlan bawk.

SIAHA

Siahaah chuan R-Day hi zing dar 8:30-ah District Playground-ah lawm a ni a, bawrhsap Lalsangliana'n hnam puanzar a pawt pharh. Parade contigent 13 - uniform contingent panga leh school contingent pariat an lám a; uniform contingent-ah Don Bosco School NCC leh school contingent-ah Hill Gate School-te pakhatna an ni.

R-Day lawmnaah hian R-Day puala volleyball intihsiaka ti ṭhate hnenah lawmman hlan a ni a; Siaha district-a hmun pakua - jail, damdawi-in leh fahrah enkawlnaahte R-Day thilpek atan Rs 3,000 ṭheuh hlan a ni bawk.

CHAMPHAI

Champhaiah chuan chawhma dar 10-ah Chhangphut Field-ah lawm a ni a, bawrhsap James Lalrinchhana'n hnam puanzar pawt pharhin, lawmman chi hrang hrang a sem.

Parade contingent 18 an awm a, chu'ngte chu armed contingent pakhat, unarmed contingent panga leh school contingent 12 an ni a, Aizawl aṭangin Mizo High School Pipe Band-te an tel bawk. Parade-a pakhatnate chu - school contingent-ah Eastern Flower Academy leh unarmed contingent-ah Champhai College NCC an ni.

Champhai Town Cleanliness Competition 2022 lawmman sem a ni a; Champhaia veng fai berah Venglai, pisa fai berah DFO Office, zirna-in fai berah Vengsang H/S, PES Zotlang, Tlangsam P/S-II leh Zotlang Anganwadi Centre-II, restaurant fai berah Hotel Chawngthu, bazar fai berah Bazarpui leh damdawi-in fai berah District Hospital-te thlan a ni.

KOLASIB

Kolasib-ah chuan Project Venga Kolasib Stadium-ah R-Day lawm a ni a, bawrhsap John LT Sanga'n puanzar pawt a pharh. Bawrhsap chuan, Police hmalaknain dan loa kuhva ro phur luh ip 945 man a nih tawh thu leh thil rûk cheng nuai 42 hû hmuh lêt a nih thu a sawi.

Kolasib-ah hian parade contingent eng emaw zat an awm a, unarmed contingent-ah DIET, Kolasib chu pakhatna an ni a, school contingent-ah CZ Higher Secondary School pakhatna an ni.

Bawrhsap sawi danin, Kolasib district-ah MGNREGS-a inziak lut mi 20,899 awmin, sorkar kum kal mekah ni 80 inhlawhna siam a ni rawh a; Housing for All kaltlangin chhungkaw harsa zual 451 hnenah in sak ṭanpuina pek a ni tawh. Kum 2022 chhungin in 8,657-ah tui herh haw theiha siam a ni tawh bawk.

SERCHHIP

Serchhipah chuan Serchhip Sports Stadium-ah R-Day lawm a ni a, bawrhsap Nazuk Kumar khuallian niin, hnam puanzar a pawt pharh. DC hian parade contingent 13-te'n hnam puanzar chibai an bûk a chháng lêt a, thuchah a sawi.

R-Day pualin District Hospital, Mercy Hospital, Unity Orphanage Home, Shalom Special School, Zoar Deprived Children Home, Old Age Home, Adult Rehabilitation Centre leh District Jail-ahte thilpek hlan a ni. Parade-ah All Saints School chu pakhatna niin, lawmman hlan an ni a, fainaa inelna hrang hrang leh Republic Day puala buatsaih volleyball tournament-a ti ṭhate hnenah lawmman hlan a ni bawk.

Serchhip DC sawi danin, kum 2022 chhungin police-te'n Serchhip district-ah thubuai 161 ziak lutin, thubuai 137-ah chargesheet an siam. District pumah MGNREGS hnuaiah mi 15,961-in job card an nei a, sorkar kum kal mekah ni 67 inhlawhna siam tawh a ni.

LAWNGTLAI

Lawngtlaiah chuan Central YLA khelmualah lawm a ni a, district bawrhsap Amol Srivastava-a'n hnam puanzar pawt pharhin, parade contingent 23-te'n hnam puanzar chibai an bûk a chhâng lêt a, thuchah a sawi.

Parade contingent-te chu armed contingent pakhat, unarmed contingent pali leh school contingent 18 an ni a, Don Bosco School chu NCC an ni. UDPA department-in faina lama intihsiak an buatsaiha ti ṭhate hnenah lawmman hlan a ni a, Central YLA hnuaia Drugs Reduction Squad hnenah chawimawina hlan a nih bakah, R-Day pualin damdawi-in, jail leh home/centre hrang hrangah Rs 2,000 ṭheuh hlan a ni bawk.

Fainaa inelnaah veng fai berah AOC Veng, sorkar zirna-in fai berah Bazar M/S, sorkar pisa fai berah Power & Electricity office, damdawi-in fai berah District Hospital, hotel fai berah Sugar & Spice - Dingdi leh restaurant fai berah MB Restaurant thlan an ni.

MAMIT

R-Day hi Mamitah chuan GSA Playground-ah lawm a ni a, bawrhsap Lalnunhlua'n hnam puanzar pawt pharhin, parade contingent-te'n hnam puanzar chibai an bûk a chháng lêt.

Mamita R-Day lawmnaah hian parade contigent 14 awmin, school contingent 12, armed contingent pakhat leh unarmed contingent pakhat an ni a; school contigent zingah JNV Girls chu pakhatna an ni.

R-Day pualin Mamit DC chuan District Hospital, Swadar Greh, Buannel Children's Home, Joshua Children's Home leh District Jail-te a tlawh a, thilpek a hlan a ni.

KHAWZAWL

Khawzawlah chuan Mualvawm Field-ah R-Day lawm a ni a, bawrhsap CC Lalchhuangkima'n hnam puanzar a pawt pharh a, R-Day thuchah a sawi.

Parade contingent 14 awmin, armed contingent pakhat, unarmed contingent pathum leh school contingent 10 an awm a, Khawzawl Vengthar PES pakhatna an ni a; parade-a ti ṭhate leh R-Day puala intihsiak buatsaiha ti ṭhate hnenah lawmman hlan a ni.

Bawrhsap sawi danin, Khawzawl district-ah hian kum 2022 chhungin SEDP pilot project hnuaiah chhungkaw 898 hnenah vaimim chi kg. 20 ṭheuh pek a ni a, chhungkaw 25 hnenah fu chi 4,000 ṭheuh pek a ni. SEDP family oriented hnuaiah Tuichang bialah chhungkaw 813 (vaimim leh bekang chíngtu 628, fu chíngtu 22 leh leilet (WRC) siamtu 163) hnenah Rs 25,000 ṭheuh pek a ni tawh.

HNAHTHIAL

Hnahthialah chuan HDFA Turf Ground-ah lawm a ni a, bawrhsap R Lalremsanga'n hnam puanzar pawt pharhin parade contingent 11-te'n chibai an bûk a chháng lêt. Faina inelnaa lawmmante sem a ni.

Bawrhsap R Lalremsanga chuan thuchah a sawiah, Hnahthial district-a village council 21-ah Myanmar râltlân an awm mek thu leh sorkar duh danin identity card siamsak vek an nih thu a sawi.

HMUN DANG

Republic Day vawi 74-na hi Gauhati High Court, Aizawl Bench-ah pawh zing dar 8 khan lawm a ni a, Gauhati High Court judge Justice Michael Zothankhuma'n hnam puanzar a pawt pharh a, 225 Battalion CRPF-in hnam puanzar chibai an bûk. He hunah hian Gauhati High Court judge Justice Marli Vankung, registrar Joel Joseph Denga leh dan rorelna lama mi eng emaw zat an tel.

Chief Minister's Office tualah pawh R-Day lawm a ni a, chief minister Zoramthanga'n hnam puanzar a pawt pharh. He hunah hian CMO-a thawkte an tel a ni.

Aizawl Theological College pawhin an hmunah R-Day an lawm a, minister Lalchhandama Ralte-in hmanpuiin, hnam puanzar a pawt pharh. R-Day puala hun hman zawhah Minister hi ATC-a thawkte leh zirlaite nen an inkâwm a; Minister chuan, academic session April - March chu India ram puma kal dan a nih avangin thlâk tumna a awm loh thu a sawi.